Тырыш ғаилә — ауыл тотҡаһы

Ауыл ерендә мал аҫрамайынса көн күреүҙе күҙ алдына килтереүе лә ҡыйын. Айырыуса һыйыр малы ауыл кешеһенең төп туйындырыусыһы булып тора. Ләкин ул һый табынға килеп ирешкәнсе ни тиклем борсоу-мәшәҡәт аша үтергә, күпме тырышырға тура килеүен мал ҡараған кеше генә белә.

Билгештә ғүмер кисереүсе Айгөл һәм Хәмис Хиләжетдиновтар ауылдың тырыш ғаиләләренең береһе. Айгөл Равиль ҡыҙы фельдшер-акушерлыҡ пунктында фельдшер булып эшләй, ә Хәмис  Хәмзә улы ер эшкәртеү, мал ҡарау менән шөғөлләнә. Йыраҡтан уҡ күҙгә һалынып торған күркәм йорт бирелә булдыҡлы, тырыш хужалар йәшәгәнлеген күрһәтеп, балҡып тора. Ихата төҙөк, өй алдында бөхтәлек.

• Мөгөҙлө эре мал күпләп аҫырайбыҙ. Шулай уҡ арендаға алынған еребеҙ ҙә бар. Уны эшкәртәбеҙ, бесәнен эшләйбеҙ, ҡыҫҡаһы, малдарға етерлек аҙыҡты шунда әҙерләйбеҙ, — ти йорт хужаһы Хәмис Хәмзә улы. — Себерҙә эшләй инем, әммә күңел һәр саҡ тыуған яҡҡа тартты. Ике быҙауҙан ғына башлағайныҡ, бөгөнгә  быҙауҙар ҙа,  һыйырҙар ҙа бихисап булып китте, Аллаға шөкөр, ең һыҙғанып эшлә генә. Ер эшен бик яратам, тыуған ауылыбыҙҙа, тыуған еребеҙҙә файҙалы, кәрәкле булып йәшәү үҙе бер бәхет. Ауылыбыҙҙың күркәмлеген һаҡлауҙа аҙ ғына булһа ла өлөшөбөҙ бар икән, быны мин ҙур ғорурлыҡ тип ҡабул итәм.

Хиләжетдиновтарҙың 8-се класта белем алыусы  улдары Салауат та үҙҙәре кеүек тырыш, уҡыу алдынғыһы, актив, олимпиадаларҙа һәр саҡ еңеүҙәре менән ата-әсәһен, уҡытыусыларын һөйөндөрөп тора.  Ниндәй генә саралар үтмәһен, береһе лә уның ҡатнашлығынан башҡа үтмәй. Телһөйәр, тыуған яғының рухлы улы Асҡын районы башҡорттары Кесе ҡоролтайының рәйесе лә булып тора. Ата-әсәһе лә улдары менән ихлас ғорурлана. Салауат ата-әсәһенә йорт эштәрендә ярҙамлашырға ла ваҡыт таба.

• Тыуған ауылыбыҙҙан ситкә китеүҙе күҙ алдыбыҙға ла килтермәйбеҙ. Ошо ерҙә тыуып үҫтек, шатланып йәшәйбеҙ. Эшемде яратып башҡарам. Ауылдаштарыма ярҙам итә алыуым менән бәхетлемен, — ти Айгөл Равиль ҡыҙы.

Әйе, ауылда фельдшер эшенең ни тиклем яуаплылыҡ талап иткәнлеген һәр кем яҡшы аңлай. Иртәме, кисме, төн уртаһымы — ауыл фельдшеры һәр ваҡыт һаҡта. Ниндәй генә хәлдә лә юғалып ҡалмай, ярҙам итергә ашыға ул.

• Ауылда йәшәгән кешегә ялҡауланып, иренеп ятырға ваҡыт юҡ. Әгәр ҙә матур йәшәйем, өҫтәлемдә һәр ваҡыт һыйым булһын тиһәң, эшләргә һәм тырышырға кәрәк. Иртә яҙҙан мал аҙығын хәстәрләүҙән башлайбыҙ, сөнки ҡышҡа ҡәҙәр барыһын да өлгөртөү мөһим. Ә был, әлбиттә, бик күп ваҡыт һәм көс талап итә. Ер кешеләребеҙ, бар булмышыбыҙ менән ергә береккәнбеҙ. Икебеҙ ҙә  ауылда үҫкәс, мал  ҡарау рәтен яҡшы беләбеҙ. Шөғөлөбөҙ ҙә үҙебеҙгә оҡшай. Майын, ҡаймағын эшләйбеҙ, итен һатабыҙ. Яҡшы сифатлы итте  ауылыбыҙҙа ла теләп алалар, — ти ғаилә башлығы.

Әйе, бына шундайуңған  кешеләре менән ауыл йәшәй ҙә инде. Улар бар булмышы менән ауыл балаһы. Тыуған яҡтарына, тыуған ерҙәренә булған һөйөүҙәре, ихтирамдары уларҙың үҙҙәрен хөрмәтле иткән. Киләсәктә лә эштәре уң булһын, уй–хыялдары тормошҡа ашһын, ауыл ҡото, Билгештең йөҙөк ҡашы булып йәшәүҙәрен дауам итһендәр. Ә беҙ, үҙ сиратыбыҙҙа, был тырыш ғаиләгә уңыштар ғына юлдаш булыуын теләйбеҙ.

Сөмбөл Әсләмова.