Күмәк көс, тырышлыҡ менән 20-нән артыҡ ҡаҙҙы тиҙ арала йолҡоп, эсен-башын таҙартып та ҡуйҙылар. Өмәгә килгән туғандары, күршеләре араһында Динар Сәлимхан улының 80-де уҙған әсәһе Нәфизә әбей ҙә бар ине.
— Ҡаҙҙы байтаҡ йылдар ҡарайбыҙ. Быйыл инкубатор һатып алып, бәпкәләрҙе йомортҡанан үҙем сығарттым. Элек ҡаҙҙарҙы ҡар яуғас, һыуытҡас ҡына йолҡа торғайныҡ. Хәҙер һәр кемдә икешәр-өсәр һыуытҡыс, ҡар яуғанын көтөп тормайбыҙ. Ҡаҙ итен балалар ҙа, үҙебеҙ ҙә бик яратып ашайбыҙ. Шатлыҡ менән барыбыҙҙың да ризығына яҙһын, — ти Рәзинә Ҡәдим ҡыҙы.