Сирлеләр араһында ауырлы ҡатындар юҡ!

Мәҫәлән, интернетта фатирҙар-йорттар буйлап, йәнәһе, мутлашыусылар йөрөй, дезинфекция үткәреү һылтауы менән талап сығалар икән, тигәнерәк хәбәрҙәр осраны. Башҡортостан буйынса Эске эштәр министрлығы вәкиле Максим Родионов был йәһәттән полицияға мөрәжәғәттәрҙең булманыуы белдерҙе, шул уҡ ваҡытта медицина тәғәйенләнешле тауарҙарҙы интернет аша һатып алғанда һаҡ булырға ҡушты – мутлашыусылар осрап тора.

Баш ҡаланың бала табыу йорттарының береһендә коронавирус менән сирләгән өс ауырлы ҡатын ята икән тигән хәбәр ҙә – ялған. Был хаҡта һаулыҡ һаҡлау министры Максим Забелин белдерҙе. Унан тыш, бөгөн коронавирус йоҡҡан тигән шик аҫтында дауаханаларҙа ятыусылар араһында ла ауырлылар юҡ.

Ғөмүмән, ошо тынғыһыҙ осорҙа фәҡәт дөрөҫ сығанаҡтарға таянығыҙ, мәғлүмәтте рәсми сайттарҙан алығыҙ, тип тағы берҙе иҫкәртәбеҙ һеҙҙе, хөрмәтле яҡташтар!

Фото:dreamstime