Һөйөнсө! Башҡорт филологияһы диссоветы асылды!

Башҡорт теле йылында донъялағы берҙән-бер Диссертация советының асылыуы (дөрөҫөрәге, тергеҙелеүе) - шатлыҡлы күренеш. Юғары уҡыу йортондағы советтың яңы һулыш алыуы фән эшмәкәрҙәренә оло дәртләндереү сараһы буласаҡ, ғилми кадрҙар әҙерләүҙең сифатын күтәрерәсәк, тигән фекерҙә етәкселек. “Республика Башлығы Радий Хәбировҡа оло рәхмәтебеҙҙе еткерәбеҙ. Башҡорт филологияһы буйынса диссертация советы тап уның ярҙамы менән асылды”, - ти БДУ ректоры Николай Морозкин.

Диссовет асылыуы – вуз, деканат етәкселеге һәм барлыҡ ғилми берлек өсөн оло яуаплылыҡ. Сөнки РФ Юғары аттестация комиссияһының ике ғилми дәрәжәне инҡар итһә, Совет автоматик рәүештә эшмәкәрлеген туҡтатасаҡ. Шуға күрә етәкселек бөтә талаптарға яуап биргән ғилми диссертацияларҙы ғына ҡабул итергә тейеш.

БДУ-ла әлеге ваҡытта барлығы туғыҙ совет эшләп килә – физик химия, шыйыҡлыҡ, газ һәм плазма механикаһы, үҫемлектәрҙең ботаникаһы, физиологияһы һәм биохимияһы, рус теле, тарих, иҡтисад теорияһы, герман телдәре һәм фәлсәфәнән кандидатлыҡ һәм докторлыҡ буйынса диссертация советтары.

Әйткәндәй, киләһе аҙнала Башҡорт дәүләт университеты ойошторолоуына 110 йыллыҡ юбилей саралары уҙасаҡ. Абруйлы вузға арналған төп сара 18 мартта “Торатау” Конгресс-холында билдәләнәсәк.