Өмәләр үтә, ауыл йәмләнә

“Айыҡ ауыл” республика конкурсында ҡатнашыусы Солтанбәк ауылы халҡы торған ерҙәренең хозурлығын аңлап, матурлыҡты һаҡларға, тағы ла күркәмерәк итеп йәшәү өсөн тырыша бөгөн. Йүнсел хужалар йорттарын ремонтлай, кәртә-ҡураларын да сағыу төҫлө ҡалай менән тотоп ала, ә уңған хужабикәләр ихата һәм баҡсаларында күҙ яуын алырлыҡ гөл- сәскәләр үҫтереп, матурлыҡ өләшә. Ә бит былар барыһы ла тырыш хеҙмәт һөҙөмтәһе.

Әйе, уңған солтанбәктәр бер-береһенә таяныс булып, ярҙам итеп йәшәй. Ата-бабаларҙан ҡалған изге йолаларҙы һаҡлай, ҡәҙерләй. Өй күтәреү булһынмы, һуңғы юлға оҙатыумы – барыһы ла килә.

Ауылда өмәләр ҙә йыш үтә. 21 августа сираттағы өмәгә сыға урындағы халыҡ. Ирҙәр магазин, ҡараусыһыҙ ҡалған йорт тирәләрендәге иҫке кәртәләрҙе һүтеп таҙарта, ҡатын-ҡыҙҙар сүп-сар йыя, сүп үләндәрен саба. Күмәкләгән — яу ҡайтарған, тигәндәй, бергәләп тотонғас, эш ырамлы бара. Артабан да шулай үҙ-ара дуҫ, татыу йәшәп, тырыш хеҙмәт менән донъяны матурлап, йәшәүҙән йәм табып ғүмер итегеҙ!