Асҡын районы мәктәптәрендә ҡыҙыҡлы ла, фәһемле лә осрашыу үтте

Ул 11-се кластарҙың кем булырға теләүҙәре, ниндәй уҡыу йортона инергә әҙерләнеүҙәре менән ҡыҙыҡһынды. Артабан уҡыусыларҙы илебеҙҙең баш ҡалаһына белем алырға саҡырҙы. Салауат Юнысов Мәскәүҙә яҡташ студенттар ойошторған ассоциация булыуы, был ойошманың сығарылыш класс уҡыусыларына ярҙам ҡулы һуҙырға әҙерлеге тураһында ентекләп һөйләне. "Бер нәмәнән дә ҡурыҡмағыҙ. Алдығыҙға ҙур маҡсаттар ҡуйып, тырышып уҡығыҙ. Мәскәүҙә студенттарға һәр яҡлап үҫешер өсөн бөтә шарттар булдырылған. Финанс яғынан да баш ҡаланы ҡиммәтле, тип атамаҫ инем. Метрола йөрөр өсөн социаль карта — 395, ә автобусҡа 250 һум тора. Бер мәртәбә һатып алып ҡуйһаң, ай буйына рәхәтләнеп йөрөйһөң. Дөйөм ятаҡҡа түләү хаҡы Башҡортостандағы кеүек. Мин белем алған уҡыу йортонда Ейәнсура, Хәйбулла кеүек көньяҡ райондарҙан егет һәм ҡыҙҙар күп уҡый. Ә Асҡындан береһен дә осратманым әлегә. Тормошоғоҙ матур, етеш, ҡыҙыҡлы булһын, тиһәгеҙ әүҙемлек, батырлыҡ һәм ныҡышмалылыҡ кәрәк", — тине ул. Уҡыусылар осрашыуҙа анкета ла тултырҙы. Уларҙы Салауат ассоциацияның Өфөләге штабына тапшырасағын белдерҙе. Тырыш студент уҡыусыларҙың һорауҙарына яуап бирҙе, Мәскәүҙәге студенттар тураһында төшөрөлгән видео фильмын да күрһәтте.

Салауат Юнысов Мәскәү башҡорттары ҡоролтайы рәйесе, райондашыбыҙ Салауат Әхмәҙуллиндың балыҡсы ырыуы башҡорттары һөйләшен һаҡлауға йүнәлтелгән проекты тураһында ла һөйләп, ҡатнашырға саҡырҙы.

Осрашыуҙа Асҡын районы башҡорттары ҡоролтайы ағзаһы Фәнзәт Мөғтәбәров та ҡатнашты һәм һайлау алдында торған йәштәргә үҙ һүҙен әйтте. Белеме буйынса —тарих уҡытыусыһы, ә бөгөн үҙен эшҡыуарлыҡта һынау теләге менән янған егет уҡыусыларҙы шундай мөмкинлекте ҡулдан ысҡындырмаҫҡа, ваҡытты бушҡа үткәрмәҫкә, Берҙәм дәүләт имтихандарына ныҡлап әҙерләнергә саҡырҙы.