Борайҙа иҫ киткес матур, заманса, уңайлы балалар майҙансығы асылды

Сарала район хакимиәте башлығы Борис Нурисламов, шулай уҡ мәртәбәле ҡунаҡтар — Башҡортостан Республикаһы Дәүләт Йыйылышы — Ҡоролтай рәйесе, “Берҙәм Рәсәй” төбәк бүлексәһе секретары Константин Толкачев, БР алтынсы саҡырылыш Дәүләт Йыйылышы — Ҡоролтайҙың 55-се Бөй һайлау округы буйынса депутаты Рәмзил Низаметдинов, республиканың Ауыл хужалығы министрлығынан вәкил Рәфис Зәйнүков ҡатнашты.

Балалар майҙансығы федераль, республика һәм урындағы бюджет аҡсалары иҫәбенә төҙөлдө. Проект “2014-2020 йылдарға ауыл биләмәләренең тотороҡло үҫеше” федераль маҡсатлы программаһы сиктәрендә тормошҡа ашырылды. Объекттың хаҡы өс миллион һумдан ашыу, шуның 1,9 миллионы — грант ярҙамы.

Яңы уйын комплексы йыһазланышы буйынса ҡаланыҡынан бер ҙә ҡалышмай. Турниктар, тауҙар, аттракциондар, карусель, ҡомлоҡтар — барыһы ла хәүефһеҙлек нормаларына яуап бирә. Майҙанға йығылғанда имгәнеүҙән һаҡлаусы резина түшәлгән. Быға бигерәк тә ата-әсәләр ҡыуанды. Шулай уҡ тренажерҙарҙа сәләмәтлеге сикләнгән балалар ҙа шөғөлләнә ала.

— Беҙ ауыл ерендә лә ошондай ҡоролмалар урынлаштырылыуға ҙур иғтибар бирәбеҙ. Балалар бер нәмәнән дә мәхрүм ителмәһен, ҡыуанып, шатланып үҫһен һәм мөмкинлектәрен бар йүнәлештә лә тормошҡа ашыра алһын, — тине тантанала Константин Толкачев.

“Әкиәт” майҙансығы — районда “Ауыл биләмәләренең тотороҡло үҫеше” федераль программаһы сиктәрендә тормошҡа ашырылған икенсе проект. Ул борайҙар өсөн генә түгел, ә ҡунаҡҡа ҡайтҡан балалар өсөн дә ҙур бүләк булды.

Эльвира Исламова фотоһы.