Төбәктә Мостай Кәрим исемендәге әҙәби бәйгегә 20-гә яҡын әҫәр килгән

Башҡортостанда Мостай Кәрим исемендәге әҙәби конкурс дауам итә. Бәйге республиканың 100 йыллығына һәм Башҡортостандың халыҡ шағиры Мостай Кәримдең тыуыуына 100 йыл тулыуға арналған.

«Йәшлек» гәзите редакцияһынан хәбәр итеүҙәренсә, өс ай эсендә 20-гә яҡын хикәйә килгән, шуларҙың иң яҡшылары псевдоним аҫтында гәзит биттәрендә донъя күрә. Танылған яҙыусылар һәм редакция хеҙмәткәрҙәре бер еңеүсене билдәләй. Төп бүләк — 50 мең һум, шулай уҡ дүрт дәртләндереү бүләге лә ҡаралған. Башҡорт ҡатын-ҡыҙҙары йәмғиәте ҡатын-ҡыҙ авторҙар өсөн махсус приз әҙерләгән.

Конкурсҡа ирекле темаға күләме 10 биттән артмаған проза әҫәрҙәре ҡабул ителә, йәш буйынса сикләүҙәр юҡ. Әҫәрҙәрҙе «Йәшлек» гәзитенә яҙылыу квитанцияһының күсермәһе менән Өфө, Октябрҙең 50 йыллығы урамы, 13 адресына йәки «конкурсҡа» тигән билдә менән [email protected] электрон почтаһына ебәрергә мөмкин. Башҡа конкурстарҙа ҡатнашмаған һәм бер ҡайҙа ла баҫылмаған әҫәрҙәр генә ҡарала. Хикәйәләр 2018 йылдың 10 ғинуарынан 2019 йылдың 1 сентябренә тиклем ҡабул ителә.

Бәйгегә йомғаҡ 2019 йылдың октябрендә яһала. Юғары баһа алған 10-15 әҫәр «Китап» нәшриәтендә айырым йыйынтыҡ булып донъя күрә. Авторҙарға гонорар түләнмәй.

Конкурсты ойоштороусылар — Башҡортостандың Яҙыусылар союзы һәм З. Биишева исемендәге Башҡортостан «Китап» нәшриәте булышлығында «Йәшлек» гәзите. Конкурстың положениеһы менән «Йәшлек» гәзитенең рәсми сайтында һәм «Бәйләнештә» конкурстың төркөмөндә танышырға мөмкин.

«Башинформ» мәғлүмәт агентлығы.