Көслө рухлы, оло йөрәкле атай бит ул

Венер Фәрит улы — йәш булыуына ҡарамаҫтан, Солтанай ауылының ихтирамлы, сәләмәт тормош алып барыусы, күптәргә өлгө булырлыҡ ир асылы. Ул тормош ҡуйған һынауҙарға баш эймәйенсә, ике сабыйына әсәйҙәрен алмаштырған яҡын дуҫ та, ысын атай ҙа, әсәһе Ғәлиә апайға, бер туғаны Венера ғаиләһенә, Ғәйшә апаһына ныҡлы терәк тә булып йәшәй.

...Тормош шатлыҡ-ҡыуаныстарҙан ғына тормай шул. Венер алты йәшендә атайһыҙ ҡала. Ҡариҙел районының Байҡы-Юныс ауылынан улар Солтанай ауылына ҡайтып төпләнә. Ғаиләлә Венерҙан башҡа һеңлеһе Венера үҫә. Әсәйҙәре Ғәлиә Шәрифулла ҡыҙы ғүмере буйы Солтанай мәктәбендә башланғыс класс уҡыусыларына белем һәм тәрбиә бирә. Тырыш, уңған, сәләмәт тормош алып барған ғаиләлә әсәһенән, олаталары, Бөйөк Ватан һуғышы ветераны Шәрифулла бабайҙан һәм өләсәйҙәре Нәфизә әбейҙән матур өлгө алып үҫә балалар. Солтанай мәктәбен яҡшы билдәләргә тамамлап, артабан уҡып һөнәр алалар.

Икенсе ҡабат яҙмыш Венерҙы ныҡлыҡҡа, ихтыяр көсөнә ғаилә ҡорғас һынай. Үҙенең мөхәббәтен осратып, матур ғаилә ҡора улар. Асҡын ҡыҙы Гөлшат та алсаҡ йөҙлө, бар эшкә лә уңған була. Ике балаға ғүмер бүләк итә йәштәр. Оло ҡыҙҙары Гөлгөнә менән Нияз үҫеп килә. Атай менән әсәй балаларҙың һәр аҙымына, һәр әйткән һүҙенә, яңы “һөнәрҙәренә” ҡыуана. Ләкин ауыр сир йәшеңде лә, балаларың барлығын да һорап тормай шул, — Гөлшат 37 генә йәшендә сабыйҙарын, тормош иптәшен ҡалдырып мәрхүм була.

Венер Фәрит улының ул ваҡыттағы кисерештәрен иҫкә алыу бик ауыр. Береһенән-береһе ике баланы үҫтерергә, ата хәстәрлегенән тыш әсә наҙы ла бирергә үҙендә көс таба ул. Әсәһенең, һеңлеһенең, Ғәйшә апаһының оло ярҙамын, ныҡлы хәстәрен тойоп йәшәй ул әле лә. Ваҡыт үтә, йөрәк яраларын дауалай, тиһәләр ҙә, бергә булған бәхетле миҙгелдәрҙең, ғаилә менән бергә үткәргән ваҡыттарҙың һәр береһе иҫендәлер. Был хаҡта һорауы бик ауыр. Венерҙың һағышлы, уйсан күҙҙәре күп нәмә тураһында һөйләй...

Аллаға шөкөр, Гөлгөнә менән Нияз аталарының йөҙөнә ҡыҙыллыҡ килтермәй тәрбиәле, тәүфиҡлы булып үҫеп килә. Олоһо — Асҡын 2-се урта мәктәбенең 8-се, кесеһе 6-сы класын тамамланы. Икеһе лә атайҙарынан өлгө алып иман юлында, ғәрәпсә уҡый-яҙа белә, байрамдарҙа, йома көндәрендә ауыл мәсетендә намаҙ уҡый. Әйткәндәй, Венер үҙе лә бынан бер нисә йыл элек Солтанайҙа мәсет асылыу менән уның ҡараусыһы булды, әлеге көндә лә барлыҡ дини эштәрҙе ул башҡара.