Йәшәһен ауыл, йырлап йәшәһен!

Сараны “Йырсы ауыл” район конкурсының жюри ағзаһы, “Оҙон көй” төбәк-ара конкурсының Гран-при эйәһе, “Ике аҡҡош”, “Юлдаш йыры”, “Йырау” һәм башҡа республика бәйгеләре лауреаты, райондың Балалар сәнғәт мәктәбе уҡытыусыһы Рәзидә Әхмәтова “Элмәлек” халыҡ йыры менән асты. Әйе, конкурста ҡатнашыусылар өлгө итеп күрерлек алтын тауышлы Рәзидәбеҙ, яҡташтарыбыҙ — мәртәбәле йырсылар Зөлфирә Фәрхетдинова, Рифҡәт Ғәбделйәнов бар.
“Мәңгелек хәтер” эстафетаһын Түбән Ҡарыш ауыл биләмәһенең Суртанлыкүл ауылында йәшәүсе һуғыш ветераны Абзал Нисап улы Фазлыев ҡабул итеп алды. “Һуғыштар күрмәгеҙ! Тыныслыҡ булһын!” — тигән һүҙҙәр менән мөрәжәғәт итте ул халыҡҡа. “Хөрмәтле ветераныбыҙға ҙур байрамға килгәне өсөн мең рәхмәт! Күңелде тетрәндерҙе уның ысын йөрәктән әйткән һүҙҙәре. Бөйөк Ватан һуғышы тарихын бер ваҡытта ла онотмайыҡ!” — тине сәләмләү һүҙендә район хакимиәте башлығы Илгиз Субушев. Эстафета һәм конкурстың Түбән Һикеяҙ ауыл биләмәһенән башланыуы юҡҡа түгел. Бирелә йәшәүселәр күмәк хужалыҡ, мәғариф, мәҙәниәт традицияларын һаҡлай, берҙәмлектәре менән районда дан тота.
Район хакимиәте башлығы уларҙың ошо сифаттарын билдәләп, әлеге сараларҙың да берҙәмлеккә, әүҙемлеккә әйҙәйәсәгенә ышаныс белдерҙе.
Биләмә территорияһында ике мәҙәниәт йорто һәм бер ауыл клубы эшләй. Мәҙәниәт учреждениелары эргәһендә эшләп килгән коллективтар, тупланған үҙешмәкәрҙәр концертта әүҙем ҡатнашты.
Сәхнәлә үҙ-үҙҙәрен тотоштары, милли кейемдәре, тауыштарының үҙенсәлекле һәм көслө булыуы, номерҙарҙың эшләнеше яғынан Мағашлы-Алмантай клубы үҙешмәкәрҙәренең сығышы айырылып торҙо һәм концертты күтәрҙе. Был аңлашыла ла. Клуб хеҙмәткәрҙәре Әлфинә Алексеева, Лариса Кузьмина, Артур Сайпанов етәкселегендә һәүәҫкәр артистар ауылда ғына түгел, Балтас һәм күрше район, төбәк һәм республика, Марий Эль Республикаһы сәхнәләрендә сығыш яһай. Коллективтар даими репетициялар үткәреп, һәр ваҡыт мәҙәни тонуста тора. Район хакимиәте һәм мәҙәниәт бүлеге ярҙамына таянып, берҙәм халыҡ көсө менән клуб бинаһын да төҙөк, йылы, матур итеп тота беләләр. Мәҙәни сараларҙы йыш ойошторалар, уларға ярҙам ҡулы һуҙыусы урындағы хужалыҡ — “Агропрофи” йәмғиәте һәм уның директоры, шул ерлектә тыуып-үҫкән Илдар Әкбәровҡа таяналар.
Бына шул әүҙемлек уларҙың сығышынан күҙгә бәрелеп тора. Эйе, “Йырсы ауыл” конкурсы бына шундай маҡтауға лайыҡ өҫтөнлөктәр менән бергә “яман шештәрҙе” лә, йәғни концерт алдынан йыйылып, “йырлашып” та өлгөрмәгәнлекте лә асыҡ күрһәтәсәк. Конкурстың төп шарты — тере тауышҡа йырлау. Сәхнә бейектә, тамашасыға барыһы ла күренә: халыҡ был концерттарҙа мәҙәниәт хеҙмәткәрҙәре эшенә баһа биреп барасаҡ.
Мағашлы-Алмантай ауыл клубының ҡалаҡсылар, вокаль, “Ужара” халыҡ фольклор коллективтарының, яңғыҙ йырсылар: Алена Фәтхуллина, Алена Аликаева (“Валенки” йырын башҡарғанда хатта был ҙур зал да уның тауышына тар кеүек тойолдо!), Артур Сайпанов, Татьяна Кирилованың (Вәсилә Фәттәхованың “Яңғыҙ миләш”е менән үҙәктәрҙе өҙҙө!) мари телендә генә түгел, рус һәм татар телдәрендә лә ихлас сығыш яһауҙары тамашасыларҙың дәррәү алҡыштарына лайыҡ булды.
Түбән Һикеяҙ ауылында мәктәп, балалар баҡсаһы, мәсет эшләп килеү коллективтарҙы тупларға ярҙам итә. “Ләйсән” балалар фольклор, “Асылъяр” уҡытыусылар, “Моң” уҡыусылар, “Әхирәттәр” вокаль, Гәрәйшиндар, Роза һәм Зәки Мифтаховтарҙың ғаилә, “Мораҙым” ир-егеттәр, “Өмөт” ҡушма ансамблдәре сығыштарын ҡарағанда ауылдың гөрләп йәшәгәнен күреп күңел һөйөнә. Сәхнә тултырып сыҡҡан өлкәндәр, уҡытыусылар, ир-егеттәр (быныһы һуңғы ваҡытта ауылдарҙа бөтөнләй һирәк күренешкә әйләнеп бара), мең рәхмәт һеҙгә! 2019 йылда “Берҙәм Рәсәй” партияһының “Тыуған яҡ мәҙәниәте” программаһы буйынса ҙур ремонт эштәре үткән мәҙәниәт йортонда барлыҡ шарттар ҙа бар. Түбән Һикеяҙҙан Луиза Гәрәйшина һәм Гөлнур Мәрдәнованың сығышы моңло тауыштары, йәштәрсә дәртлелек менән айырылып торҙо. Барлыҡ сараларҙа әүҙем ҡатнашыусы Рәмилә апай Сәйетованың халыҡсан моңо һәр ваҡыттағыса күңелдәргә үтеп инде. Уртайылға ауылында клуб булмаһа ла, мәҙәни саралар үткәреп, тыуған ерен төҙөкләндереүгә көс һалып, халыҡты әйҙәп йәшәүсе “Балбабай” — Йәмил Исламов бар. Матур тауышы менән бар булмышына тура килгән “Тыуған ауылым урамы” йырын ихлас башҡарҙы.
Тутағас ауылы һәүәҫкәрҙәре тураһында айырым әйтеп үтке килә. Уҙған йылда ауыл старостаһы Руслан Камалов ойоштороуында халыҡ инициатива күрһәтеп, ябылған клубты кирегә асыуға иреште, үҙ тырышлығы менән бер ни тиклем төҙөкләндереү эштәре алып барҙы. Бирелә әлегә Түбән Һикеяҙ һәм Мағашлы-Алмантай мәҙәниәт учреждениеларындағы кеүек уңайлы шарттар юҡ. Әммә тутағастар, ауырлыҡтарға ҡарамай, мәҙәни сараларҙы даими уҙҙырып, берҙәм йәшәй. Тауыштары, һайланған йырҙары, башҡарыу үҙенсәлеге яғынан Эльвира Камалова, Илмир Вәлиәхмәтов, Илфира Фаһаманова (концертты алып барыусы ла), Фәнилә Вәлиәхмәтованың яңғыҙ йырҙары халыҡҡа бик оҡшаны.
Концертта 80-дән артыҡ үҙешсән ҡатнашты, зал тамашасылар менән тулы булды. Биләмәлә сараларҙы әҙерләп үткәреүгә Түбән Һикеяҙ ауыл биләмәһе башлығы Фирдинант Арысланов, мәктәп директоры Рәзиф Арысланов, “Луч” йәмғиәте директоры Марат Ғәбиҙуллин, “Агропрофи” йәмғиәте директоры Илдар Әкбәров һәм уларҙың коллективтары, мәҙәниәт хеҙмәткәрҙәре Фәнилә Ғиләжева, Әлфинә Алексеева, Эльвира Камалова, китапханасы Диләрә Ғәлиева, балалар бейеү коллективы етәксеһе Елена Закирова ҙур көс һалды.
Эстафета дауам итә. Түбән Ҡарыш ауыл биләмәһенең туғыҙ ауылында митингыларҙа, концерттарҙа әүҙем ҡатнаша халыҡ. Шулай гөрләп торһон ине ауылдарыбыҙ, йырлап йәшәһен ине!
Ғәзим ТАЛИПОВ фотоһы.

Гөлнара ШәймөхәмәтовА.