Ҡунаҡтарҙы солтанбәктәр йыр-моң, сәк-сәк, ҡымыҙ менән ҡаршы алды

Солтанбәк мәктәбенең 100 йыллыҡ юбилейы уңайынан үткәрелгән сарала район хакимиәте башлығы Ришат Марат улы Дихин, уның финанс мәсьәләләр буйынса урынбаҫары, ауылдың кураторы Эльвиза Мәғсәт ҡыҙы Ғәйзуллина, район мәғариф бүлеге начальнигы Илшат Рәшит улы Фәтихов, район хакимиәтенең Мәҙәниәт, спорт һәм йәштәр сәйәсәте идаралығы начальнигы Альфред Зәүҡәт улы Хәжимуллин ҡатнашты.

Мәртәбәле ҡунаҡтарҙы Рәлиф Муллаянов етәкселегендәге “Ауылым моңдары” фольклор ансамбле ҡапҡа тышында уҡ дәртле йыр менән ҡаршыланы. Гөлназ Суфиянова менән Инсаф Мәрбиев шиғри юлдар менән сәләмләп, сәк-сәк һәм ҡымыҙҙан ауыҙ иттерҙе. Мәктәп ихатаһына инеүгә урындағы балалар баҡсаһына йөрөүсе кескәй ҡыҙҙар бөтөрөлөп бейергә төштө. Артур Садыҡов башҡарыуында “Әссәләмәғәләйкүм” йыры байрамға йән өрөп, күнелдәрҙе күтәреп ебәрҙе.