+2 °С
Болотло
Бөтә яңылыҡтар
Тормош һулышы
23 Ноябрь 2018, 12:02
Флидә Фәтхиеванан шиғри күстәнәс
Флидә Фәтхиева сығышы менән Асҡын районы Баҙансат ауылынан. Әлеге ваҡытта Тәтешле районының Үрге Тәтешле ауылында йәшәй, “Ҡояшҡай” балалар баҡсаһында уҡытыусы-логопед булып эшләй. Буш ваҡыттарында шиғырҙар яҙа. Әсәйҙәр көнө алдынан Флидә Фәрит ҡыҙының бер нисә шиғырын һеҙҙең иғтибарға ла тәҡдим итәбеҙ.
Балан-миләш
Ергә һалҡын көҙҙәр килде,
Бар ағас та яланғас.
Һыуыҡтарға бирешмәйсә
Ултыра балан-миләш.
Тирә-йүнгә йәм бирәләр —
Ғорур ҙа балан-миләш.
Күңелдәрҙә шиғыр тыуа
Шул матурлыҡты күргәс.
Үҙе әсе, үҙе матур,
Ҡып-ҡыҙыл емешкәйең.
Күңел борсоуҙарын ал һин,
Дуҫҡайым, миләшкәйем.
Һағыныуҙарҙы, һағыштарҙы,
Мөхәббәт ғазаптарын
Әселегең менән һүндер,
Йөрәктең яныуҙарын.
Ҡыштар етер, ҡар ҙа яуыр,
Бирешмәҫ балан-миләш.
Көслө рухлы кешеләр ҙә
Балан-миләшкә тиңдәш.
********
Ҡайтып еткәс ауыл осона
Туҡтайбыҙ ҙа зыярат буйына...
Тәрән ҡарҙы йыра-йыра кереп
Йүнәләбеҙ ҡәберең янына.
Үҙем илайым, үҙем алға атлайым,
Күңелемдән генә доға уҡыйым.
Бар булмышым менән йыраҡ ҡалған
Хәтирәләр тураһында уйлайым.
Һинһеҙ генә Яңы йылдар етә,
Һинһеҙ генә ҡарҙар яуалар.
Һинһеҙ генә ҡоштар ҡайта-китә,
Йәйҙәр, яҙҙар һинһеҙ киләләр.
Әсәйем-бәғерем, һиңә әйтер һүҙҙәр,
Серҙәр инде бик күп йыйылған.
Күңелдәрҙән ташып сыҡҡан хистәр
Күҙ йәштәре булып түгелгән.
Яңы йылдан мөғжизәләр көтөп
Йәшәй кеше ғүмер буйына.
Бер Яңы йыл һине алып беҙҙән
Илтеп һалды ерҙең ҡуйынына.
Ошо байрам етһә өр-яңынан
Кисерештәр ҡабат яңыра.
Уйҙар өйөрмәһе бөтөрөлөп
Алып ҡайта һин бар саҡтарға.
Иҫкә төшә һинең әйткән һүҙҙәр,
Теләктәрең, йылы ҡарашың.
Донъялыҡта һәр саҡ терәк булған,
Кәрәк булған өгөт-кәңәшең.
Һинең көслө рухың маяҡ булып
Әйҙәй беҙҙе тормош үренә.
Тик ниңә һуң, әсәйем, беҙгә ҡаршы
Сыға алмайһың ҡапҡа төбөнә.
*******
70 булыр ине һиңә бөгөн,
Әсәкәйем, ғәзиз әсәйем.
19 йыл юҡ шул һин арала —
Йәшләй алды һине Ер-Әсә.
70 йәштә әле ҡайһы берҙәр
Ҡабат һөйә, ҡабат өйләнә.
Белеп булмай Хоҙайҙың тәҡдирен
Кемгә күпме ғүмер бирелә.
Урамда күрһәм һиндәй апайҙарҙы
Үҙәктәрем минең өҙөлә.
Уйҙарымда һине олоғайтам,
Йәш әле һин бары хәтерҙә.
Әбейҙәрсә яулыҡ та бәйләтәм,
Аҡрын-аҡрын һине атлатам.
Ҡайһы саҡта көлөмһөрәтеп
Ишектәрҙән һине индерәм...
Былар бар ҙа хыялда ғына бит —
Булмай инде улай эшләтеп.
Һинең менән тик төштәрҙә генә
Һөйләшептәр була, осрашып.
Рәнйеп ятма, әсәйем, бер үк кенә,
Һис кенә лә һине онотмайым.
Бөйөк Әсә исеме менән һине
Йырҙарымда һәр саҡ ҙурлайым.
Ул донъяның ожмах ҡошолор һин,
Шулай булыуына шигем юҡ.
Һағындым, тип барып күреп булмай,
Теге донъяларға юлдар юҡ.
Доға юллайым әрүахтар иленә,
Тыныс булһын ятҡан ерҙәрең.
Барып ирешһендәр теләктәрем —
Яҡты булһа ине гүрҙәрең.
Читайте нас:
© 2025 Сайт издания "Йәнтөйәк" Копирование информации сайта разрешено только с письменного согласия администрации. Башҡортостан Республикаһының Матбуғат һәм киң мәғлүмәт саралары агентлығы һәм Башҡортостан Республикаһының "Башҡортостан Республикаһы" Нәшриәт йорто дәүләт унитар предприятиеһы.
Телефон
8(34771) 2-18-50
Электрон почта
Адресы
452880, Аскинский район, с. Аскино, ул. Блюхера, 10
Реклама хеҙмәте
8(34771) 2-20-60
Редакция
8(34771) 2-18-50
Кадрҙар бүлеге
8-34771 (2-19-30)