Балтас районы Иҫке Уразай урта мәктәбе 50 йыллығын билдәләне

Уразай урта мәктәбе бинаһы йыраҡтан балҡып, ауыл күрке булып тора. Мәктәп етәкселәрҙән уңған. 1955-1979 йылдарҙа бирелә БАССР-ҙың атҡаҙанған уҡытыусыһы Ғәрәби Вәлиев директор булып эшләй. Нәҡ ошо дәүерҙә һигеҙ йыллыҡ мәктәп урта мәктәп статусын ала, 180 уҡыусыға иҫәпләнгән бина сафҡа индерелә, юғары белемле уҡытыусылар эшкә саҡырыла һәм уларға биш фатир төҙөлә. Яҡын-тирәләге туғыҙ ауыл өсөн Уразай урта мәктәбе ныҡлы белем биреү усағына әйләнә. Ғәрәби Сафа улынан етәкселекте Башҡортостан Республикаһының атҡаҙанған уҡытыусыһы Вәлидийән Исмәғилев ҡабул итә. Ул 1987 йылға тиклем директор вазифаһын башҡара. Шул осорҙа дүрт берәмек яңы техника һатып алына, ашхана төҙөлә. Һуңғы 27 йылда мәктәп менән Башҡортостандың атҡаҙанған уҡытыусыһы Марат Закиров етәкселек итә. Был йылдарҙа белем усағының матди-техник базаһы тағы ла нығытыла: физика, химия, информатика кабинеттары — яңы йыһаздар, мәктәп ЗИЛ-130 автомобиле, Т-140 тракторы, автобус менән тәьмин ителә, йылы гараж, һыу үткәргес төҙөлә, мәктәп газ менән йылытыуға күсерелә, бинаға евроремонт яһала. Бөгөн мәктәптә уҡыу һәм уҡытыу өсөн барлыҡ шарттар ҙа булдырылған.

Байрам уҡытыусылар һәм ауыл мәҙәниәт йорто һәүәҫкәрҙәренең вокаль коллективы башҡарыуында “Һабаҡташтар” йыры менән башланды. Район хакимиәте башлығы Илгиз Субушев йыйылған халыҡты йылы тәбрикләп, сараның иғәнәселәре, Уразай ауылының игелекле улдары — Нурихан, Фирҙәүес, Рөстәм Дилмиевтарға, байрамды ойоштороусы Марат Закировҡа, шулай уҡ мәктәп һәм ауыл тормошонда әүҙем шәхестәр Рәфҡәт Әхкәмов, Хәнис Хәкимов, Вәсит Ризуанов, Фая Вәлиева, Фирдүс Сафинға Рәхмәт хаттары тапшырҙы, Уразай урта мәктәбенә компьютер бүләк итте. Район мәғариф бүлеге начальнигы Зәлифә Мәғзүмова ҡыҫҡаса мәктәп тарихына туҡталды һәм данлы уҡытыусыларҙың исемдәрен хөрмәт менән иҫкә алды. Иҫке Янбай ауыл биләмәһе башлығы Рәзиф Ахунов байрамға әҙерлек эштәрендә әүҙем ҡатнашыусыларға рәхмәт белдерҙе. Нурихан Шәмселбаян улы ауылдаштарына ихлас ҡотлау һүҙҙәрен юллап, оло быуын уҡытыусыларына бүләктәр өләште. Мәктәптең беренсе һәм икенсе сығарылыш уҡыусылары исеменән Рәфҡәт Әхкәмов һәм Хәнис Хәкимов сығыш яһаны. Рәфҡәт Хәкимйән улының: “Йылдар уҙған һайын бала саҡ нығыраҡ һағындыра. Сәстәргә бәҫ ҡунһа ла, һаман иҫтә ҡыңғыраулы мәктәп йылдары”, — тип, тулҡынланып әйткән һүҙҙәре байрамдың төрлө быуын уҡыусылар, ауыл халҡы өсөн кәрәклеген, көтөп алынғанлығын иҫбатланы.

Уҡытыусылар коллективы тарафынан эшләнгән стендтарға һәр йылғы сығарылыш уҡыусыларының исемдәре яҙылған, күмәк фотолары ҡуйылғайны. Улар янынан кеше көн буйына өҙөлмәне.

Тарихҡа күҙ һалһаҡ, Иҫке Уразай ауылында 1870 йылда уҡ ике училище булып, балаларҙы итексе, тегеүсе һәм умартасы һөнәрҙәренә өйрәткәндәр. 1905 йылда мәҙрәсә асыла. 1919 йылда яңыса белем биреү мәктәбе эшләй башлай. 1922 йылда — башланғыс, 1936 йылда — ете йыллыҡ белем биреү, ә һуғыштан һуңғы йылдарҙа етемдәр йорто ла бирелә ойошторола. Сарала сығыш яһаусылар төрлө йылдарҙа фиҙаҡәр хеҙмәттәре менән халыҡ абруйын яулаған уҡытыусыларҙың исемдәрен ҡабат-ҡабат атаны. Шуныһы ҡыуаныслы, педагогик коллектив уҡыусыларға белем һәм тәрбиәне юғары дәрәжәлә биреү традицияһын юғалтмай. Берҙәм дәүләт имтихандарына әҙерләнгәндә тирә-яҡ ауылдарҙан, район үҙәгенән Уразайға физика, химия, рус теленән өҫтәмә дәрестәр алырға килеүсе балаларҙың күплеге генә лә уҡытыусылар коллективының белем биреү оҫталығы тураһында асыҡ һөйләй.

“Көслө педагогик коллектив белем биргән уҡыусыларыбыҙ — беҙҙең ғорурлыҡ, — тине үҙенең сығышында мәктәп директоры Марат Рәхим улы. — Мәктәпте алтын һәм көмөш миҙалға тамамлаған уҡыусыларыбыҙ юғары уҡыу йорттарында ҡыҙыл дипломдарға лайыҡ белем алып, төрлө урындарҙа уңышлы эшләй. Олимпиада һәм спорт ярыштарында ла һынатмайҙар. Республика һәм район күләмендә ирешкән юғары күрһәткестәр — уҡытыусыларҙың, уҡыусыларҙың һәм ата-әсәләрҙең берҙәм, тырыш хеҙмәте”. Марат Рәхим улы уҡытыусыларға, техник хеҙмәткәрҙәргә, мәктәп тормошона ярҙам күрһәткән кешеләргә рәхмәт һүҙҙәре юлланы.

Байрамды Илмир Фаридонов, Гөлназ Мулланурова, 30 йыл дауамында мәктәптә татар теле һәм әҙәбиәте дәрестәрен уҡытыусы, сценарий авторы Эльмира Закирова алып барҙы. Сараны Башҡортостан Республикаһының атҡаҙанған артисы, яҡташыбыҙ Рифҡәт Ғәбделйәнов, район Мәҙәниәт һарайының концерт төркөмө, “Етегән шишмә” халыҡ эстрада-фольклор, “Байрам” вокаль ансамблдәре, йырсы-композитор Рәзидә Әхмәтова, талантлы һәүәҫкәрҙәр Фиғәт Ғәлин, Эльвира Гәрәева, Уразай ауыл мәҙәниәт йорто эргәһендә тупланған “Серҙәштәр” вокаль коллективы, үҙешсәндәрҙең береһенән-береһе матур сығыштары биҙәне.

Гөлнара Шәймөхәмәтова.