Борайҙағы балалар баҡсаһында Мостай Кәрим ижады буйынса сара үтте

Был сарала балалар, тәрбиәселәр, тәрбиәсе ярҙамсылары тарафынан Мостай Кәримдең шиғырҙары яҙылған йырҙар яңғыраны, бейеүҙәр, шулай уҡ әҙиптең «Оҙон-оҙаҡ бала саҡ», «Ай тотолған төндө», «Айгөл иле» драма әҫәрҙәренән өҙөктәр күрһәтелде. Балалар ҙа «Өсөнсө көн тоташ ҡар яуа», «Ҡайын япрағы тураһында», «Айлы юл» шиғырҙарын тасуири һөйләне. Тәрбиәселәр сараны «Кис ултырып ҡыҙҙар сигеү сигә», «Яугир ҡыҙҙар» йыр-бейеүҙәре менән байытты.

Ата- әсәләр, килгән ҡунаҡтар бөйөк шағирҙың әҫәрҙәрен тыңлап хисләнде, балаларға ҡарап һоҡланды һәм бай йөкмәткеле сара өсөн ойоштороусылар рәхмәт белдерҙе.

Баһаутдинова Зинара, өҫтәмә белем биреү педагогы.