+12 °С
Ямғыр
Бөтә яңылыҡтар
Телгенәм — бергенәм
21 Март 2018, 17:59
Йәмле яҙҙы тағын ҡаршы алам, Күңелемдә шуға тантана!
Миләүшә Ҡасимова (Шәрғиева) Тусыбай ауылында йәшәй. Һөнәре буйынса — физика һәм математика уҡытыусыһы, күп йылдар инде уҡыусыларға белем биреү, тәрбиә эшендә. Ғүмер юлында һөйөклө тормош иптәшен юғалтыу ҡайғыһын кисереп, өс улын яңғыҙы үҫтерә Миләүшә Тимерғәли ҡыҙы. Шиғри күңеле уға ауырлыҡтарҙы еңергә, киләсәккә өмөт менән ҡарап, балаларына атай ныҡлығын да, әсә наҙын да бирергә ярҙам итә. Миләүшә Ҡасимованың шиғырҙары “Замандаш” Яңауыл яҙыусылар ойошмаһы тарафынан әҙерләнеп донъя күргән “Һиңә әйтер һүҙҙәрем бар...” йыйынтығында баҫылды.Һөйөнәмен яҙға
Миләүшә Ҡасимова (Шәрғиева) Тусыбай ауылында йәшәй. Һөнәре буйынса — физика һәм математика уҡытыусыһы, күп йылдар инде уҡыусыларға белем биреү, тәрбиә эшендә. Ғүмер юлында һөйөклө тормош иптәшен юғалтыу ҡайғыһын кисереп, өс улын яңғыҙы үҫтерә Миләүшә Тимерғәли ҡыҙы. Шиғри күңеле уға ауырлыҡтарҙы еңергә, киләсәккә өмөт менән ҡарап, балаларына атай ныҡлығын да, әсә наҙын да бирергә ярҙам итә. Миләүшә Ҡасимованың шиғырҙары “Замандаш” Яңауыл яҙыусылар ойошмаһы тарафынан әҙерләнеп донъя күргән “Һиңә әйтер һүҙҙәрем бар...” йыйынтығында баҫылды.
Һөйөнәмен яҙға
Тағын яҙҙар килә тыуған яҡҡа.
Ниҙәр көтөр мине яҙҙарҙа?
Ана, ҡайтҡан инде сыйырсыҡтар.
Ана, ҡайтҡан инде ҡаҙҙар ҙа.
Ҡошҡайҙарым! Тағын ҡайттығыҙмы
Һағынышып тыуған илдәрҙе?
Имен тип һөйөнәһегеҙ микән
Ҡайтып күргәс тыуған ерҙәрҙе?
Яҙҙар килә тағын тыуған яҡҡа.
Алып килһен улар тыныслыҡ.
Яҙғы һыуҙар менән килһен муллыҡ,
Ямандарҙан ергә азатлыҡ.
Һөйөнәмен: тағын яҙҙар килде.
Яңы тормош ерҙә башлана.
Йәмле яҙҙы тағын ҡаршы алам,
Күңелемдә шуға тантана!
Балама
Йыраҡтарға һине осорҙом да,
Һине һағынып уҙа ғүмерем.
Ҡоштар булып көн дө осор инем,
Балаҡайым, балам, күҙ нурым.
Өҙгөләнә йөрәк. Борсоламын.
Ялғышам түгелме, эй, Аллам?
Оҙатыуым һине йыраҡтарға,
Балаҡайым, балам, күҙ алмам!
Сабый сағың уҙған тыуған яҡты
Өҙөләһеңме һин дә һағынып?
Ҡайтыр көндәреңде көтәһеңме
Минең кеүек һин дә зарығып?
Һағыныуҙарҙың юҡ ла иге-сиге.
Иҫән генә йөрө һин, бәғерем.
Аллаһ һине бер ҙә ташламаһын,
Балаҡайым, балам, ҡәҙерлем.
Бәхетле әсә
Бәхетле ҡатын ул таба,
Уңған ҡатын ҡыҙ таба.
Мин уңғанмы, бәхетлеме?
Мин — иң бәхетле әсә!
Өс улым бар, өс терәгем.
Мине утҡа һалмаҫтар.
Өс тағаным үҙҙәре лә
Бер ҡасан да аумаҫтар.
Улдарыма бәхет теләп
Үткәрәм көндәремде,
Бәхет юрағыҙ, тип, һеҙ ҙә,
Һуғарам гөлдәремде.
Бала күңеле далала, тип,
Әйтелһә лә ҡай саҡта,
Әсә өсөн тик балаһы
Өҙөлә ауыр саҡта.
Балаларым, бәғерҙәрем!
Донъялар имен булһын!
Һеҙ илдең дә терәктәре —
Илдә тыныслыҡ булһын!
Биргәненә улдарымды
Мең-мең шөкөр Аллаға.
Уңған ҡатын булмаһам да,
Мин — бик бәхетле әсә.
Мин — бик бәхетле әсә!
Алдайым үҙемде
Әсәй-бәғерем, өҙөлөп һағынамын.
Һағынамын йылы ҡуйының.
Белһәң ине, әсәй-бәғерем, ерҙә
Һинһеҙ миңә нисек ҡыйынын.
“Сәскәм” тип сәстәремдән һыйпап,
Һуңғы тапҡыр ҡосоп үбеүең...
Белмәнем шул һине зәһәр әжәл
Бигерәк иртә алып китеүен.
Әйтер һүҙҙәрең дә әйтә алманың,
Өҙгөләнә шуға үҙәгем.
Тик баҡтылар миңә мөлдөрәмә
Һөйөү-наҙға тулы күҙҙәрең.
Донъяларым селпәрәмә килде,
Ябылдылар асыҡ ҡапҡалар.
Әсәй түгелме тип йүгереп барҙым,
Ишегемде елдәр ҡаҡһалар.
Әсәйем ауылда тип алдайым
Һағынып өҙгөләнгән күңелде.
Шуға һирәк барам ауылыма,
Һағынам да тыуған еремде,
Ул иҫән тип алдайым үҙемде...
Атай-әсәйемдең һүҙҙәре
Яҙҙар, яҙҙар, яҙҙар күңелемдә.
Наҙҙар күңелемдә һәр ваҡыт.
Әле генә йәшәй башлағандай...
“Тор, балам!” — ти әсәй уятып...
Ҡолағымда яңғырай һүҙҙәре:
“Барайыҡ тауға, еләк уңған!” — ти.
“Донъяларҙың мин матурлығына
Иҫем китеп ҡарап торам!” — ти.
“Балам, кешеләргә гел яҡшы бул!”
Быныһы атайымдың һүҙҙәре.
“Кемдәр менән, ҡайҙарҙа булһаң да,
Сөймә танауыңды юғары!”
Улар өйрәттеләр мине һәр саҡ
Һөйөп йәшәргә тип, тормошто.
Йөрәгемдә әрнеүҙәр булһа ла
Улар кеүек
Һөйәм йәмле йәйҙе, аҡ ҡышты...
Тик...
Ҡәҙерлеләремде иртә алды.
Шелтәләйем шуға яҙмышты...
Читайте нас:
© 2024 Сайт издания "Йәнтөйәк" Копирование информации сайта разрешено только с письменного согласия администрации. Башҡортостан Республикаһының Матбуғат һәм киң мәғлүмәт саралары агентлығы һәм Башҡортостан Республикаһының "Башҡортостан Республикаһы" Нәшриәт йорто дәүләт унитар предприятиеһы.
Телефон
8(34771) 2-18-50
Электрон почта
Адресы
452880, Аскинский район, с. Аскино, ул. Блюхера, 10
Реклама хеҙмәте
8(34771) 2-20-60
Редакция
8(34771) 2-18-50
Кадрҙар бүлеге
8-34771 (2-19-30)