Әүҙем, өлгөр, ихтирамлы гүзәл зат

Спорт мәктәбендә тренер-уҡытыусы учреждение эшмәкәрлегендә төп ролде уйнай. Яҡшы тренер — ул үҙенең тәрбиәләнеүселәренә бар йөрәге менән ышанған тәжрибәле педагог та, оҫта психолог та. Юлиә Ғабсадыҡова ла шундай педагогтарҙың  береһе.

Юлиә Ғабсадыҡова сығышы менән Байҡыбаш ауылынан. Урындағы мәктәптә уҡығанда еңел атлетика буйынса район һәм республика ярыштарында ҡатнаша. Спорт яратыуы ҡыҙҙы Благовещен  педагогия колледжына алып килә. Уҡыу йортон тамамлағас, дипломлы физкультура уҡытыусыһы хеҙмәт юлын Әртәкүл урта мәктәбендә башлай. Бер йылдан һуң Юлиә Наил ҡыҙын Ҡариҙел Балалар-үҫмерҙәр спорт мәктәбенә методист һәм еңел атлетика һәм аэробика буйынса тренер итеп күсерәләр. Шул уҡ ваҡытта ул Бөрө дәүләт социаль-педагогия академияһында педагог-психолог белгеслеге буйынса уҡый. 2016 йылда уны ГТО тапшырыу үҙәгенең муниципаль бүлеге мөдире итеп тәғәйенләйҙәр, ә һуңыраҡ  үҙәктең етәксеһе була. Әйткәндәй, Ҡариҙел бүлеге алты йыл рәттән иң яҡшы биш ГТО тапшырыу үҙәге исемлегенә инә.

Бынан тыш, Юлиә Ғабсадыҡова кесе мәктәп йәшендәге балаларға һауыҡтырыу аэробикаһы буйынса тренер- уҡытыусы ла, спорт мәктәбенең профсоюз комитетын етәкләй. Уның тәрбиәләнеүселәре ҙур сараларҙы үҙҙәренең спорт бейеүҙәре менән биҙәй, район концерттарында һәм Йәштәр көнө, Һабантуй, “Бала саҡ көнө”, “Ғаилә көнө” кеүек байрамдарҙа ҡатнаша. Ә кистәрен Юлиә Наил ҡыҙы ҡатын-ҡыҙҙар менән аэробика буйынса күнекмәләр үткәрә. Шулай уҡ ул волейбол буйынса район ҡатын-ҡыҙҙар йыйылма командаһы ағзаһы ла. Йыл һайын Башҡортостан Республикаһының мәғариф ойошмалары хеҙмәткәрҙәре араһында ойошторолған “Сәләмәтлек” спартакиадаһында, Ауыл спорт уйындарында һәм башҡа ярыштарҙа ҡатнаша. 2019 йылдың мартында ҡатын-ҡыҙҙар араһында үткәрелгән “Яҙғы һоҡланыу” район конкурсында еңеүсе булды. Ә “Һин ҡайҙа, бәхет шунда” сараһында фитнес буйынса оҫталыҡ дәресе күрһәтте.

Спорт Ғадсадыҡовтарҙың ғаиләһендә лә мөһим урын алып тора. Илшат Исмәғзам улы ( “ЖКХ Сервис-Караидель” учреждениеһы директоры булып эшләй) ла бала саҡтан спорт менән шөғөлләнә, бер нисә ҡабат баскетбол буйынса  турнирҙарҙа һәм муниципаль хеҙмәткәрҙәр араһында үткәрелгән фестивалдә ҡатнаша, һуңғыһында гер спорты буйынса яҡшы һөҙөмтәләр күрһәтә. 11-се класта уҡыусы Искәндәр — мини-футбол буйынса Башҡортостан Республикаһы чемпионы, баскетбол, волейбол, самбо буйынса ярыштарҙа ҡатнаша. Ә 4-се класта белем алыусы Айгиз мини-футбол һәм самбо менән уңышлы шөғөлләнә.

• Беҙҙең ғаилә әүҙем һәм татыу, төрлө конкурстарҙа ҡатнашабыҙ, даими тәбиғәт ҡосағына сығабыҙ, йылға буйлап йөҙәбеҙ, кинотеатрҙарға йөрөйбөҙ. Барыбыҙҙың да ГТО билдәләре бар, — ти Юлиә Ғабсадыҡова.

Физик культураны һәм спортты үҫтереүгә индергән өлөшө өсөн Юлиә Наил ҡыҙы Башҡортостан Республикаһы Йәштәр сәйәсәте һәм спорт министрлығының, Башҡортостан Республикаһы Хәрби-спорт фондының Почет грамоталары,  Башҡортостан Республикаһы Мәҙәниәт министрлығының Рәхмәт хаты һәм башҡалар менән бүләкләнгән.

Юлиә Ғабсадыҡова ГТО тапшырыу үҙәге етәксеһе һәм Балалар-үҫмерҙәр спорт мәктәбе тренер-уҡытыусыһы ғына түгел, ә уңыштарға һәм еңеүҙәргә дәртләндереүсе, илһамландырыусы остаз да. Уның эше сәләмәт йәшәү рәүеше ул физик әүҙемлек кенә түгел, ә дөйөм алғанда, тормошҡа дөрөҫ ҡараш икәнлеген дә күрһәтә. Юлиә Наил ҡыҙы кеүек шәхестәр булғанда тағы ла күберәк кеше үҙ һаулығы тураһында хәстәрлек күрә һәм йәшәү рәүеше тураһында уйлана башлай.

Зөлфирә Сәфәрова.