Балтас районынан Ильяс Шәймөхәмәтов һәм Айваз Сафетдинов чемпиондар тәрбиәләй

Уңыштарының нигеҙе, әлбиттә, маҡсатлы рәүештә алып барылған тренерлыҡ эшмәкәрлегендә һәм көндәлек шөғөлләнеүҙә. Йәш спортсылар тренерҙарынан уңды: Ильяс Шәймөхәмәтов һәм Айваз Сафетдинов етди һәм талапсан егеттәр, үҙ эштәренең оҫталары.

Ильяс Әхнәф улы 2008 йылда Бөрө дәүләт социаль-педагогия академияһын тамамлап, физик культура буйынса һәм педагог белгеслектәренә эйә була һәм туған мәктәбенә эшкә ҡайта. Юғары Ҡарыш мәктәбендә ете йыл дауамында физкультура дәрестәрен уҡыта, шул уҡ ваҡытта Балтас Балалар һәм үҫмерҙәр спорт мәктәбе тренеры булып эшләй. Ул юғары категориялы уҡытыусы.

Тренерлыҡ хеҙмәтенең һөҙөмтәләрен ике йылдан күрә башлай Ильяс. Уҡыусылары бер-бер артлы еңеүҙәргә ирешә. Гер спорты буйынса шәхси уңыштараға ирешеп ҡалмай, Ильяс Шәймөхәмәтовтың уҡыусылары команда менән рус лаптаһы, волейбол буйынса төбәк ярыштарында — I, финалда III, IV урындарҙы алыуға ирешә.

2015 йылда Ильяс Әхнәф улы ғаиләһе менән район үҙәгенә күсенә һәм Иҫке Балтас 1-се урта мәктәбендә педагогик эшмәкәрлеген дауам итә. 2016-2017 уҡыу йылында Филүс Хужиев Башҡортостан чемпионы титулын йәнә ала, Данил Ғиззәтуллин — II, Рәсим Әрзәғетдинов, уның менән бер рәттән яңы талантлы спортсы ҡыҙыбыҙ Розана Кашапова III урындарҙы яулай. Еңеүҙәр юлы дауам итә: 2017-2018 уҡыу йылында Башҡортостан беренселегендә Розана Кашапова менән Айгиз Хәйҙәршин — I, Денис Гәрәев III урындарҙы яулай; уҙған йылда беренселекте Розана, Айгиз, Марсель Фәтхетдинов, Ленар Марванов ала, Руслан Сәлимов — II, Айназ Хәйҙәршин пьедесталдың өсөнсө баҫҡысына менә.

Республика беренселегендә еңеүгә ирешеүсе үҫмерҙәр йыйылма команда составына инә һәм Башҡортостан данын Рәсәй ярыштарында яҡлай: Томск, Волжский, Санкт-Петербург, Сорғот, Барнаул, Рыбинск ҡалаларында яңғырата Балтас, Башҡортостан исемен Ильяс Әхнәф улының уҡыусылары! Өҫтәүенә ете уҡыусыһы спорт мастерлығына кандидатлыҡ нормативтарын үтәне.

Ильяс Әхнәф улы үҙе лә гер спорты буйынса республика ярыштарында күп тапҡыр призер булды, йыйылма команда составында Бөтә Рәсәй ауыл уйындарында Чебоксар, Чайковский, Красноярский ҡалаларында сығыш яһаны. 2013 йылда Красноярский ҡалаһында үткән ярыштарҙа II урын яулап, Рәсәй Федерацияһы Спорт министрлығының дипломы менән бүләкләнә. Ильяс Шәймөхәмәтов — Башҡортостан үҫмерҙәр йыйылма командаһының өлкән тренеры. Быйыл Киров ҡалаһында үткән ярыштарҙа, Башҡортостан командаһы III урынды яуланы.

Балалар һәм үҫмерҙәр спорт мәктәбе директоры, ҡул көрәштереү буйынса тренер Айваз Сафетдинов иһә тәүге һөнәри белемен Стәрлетамаҡ ҡалаһында физкультура техникумында ала, юғары белемде — Бөрөлә. Хеҙмәт юлын 2001 йылда башлай. Айваз Фирүз улының тәрбиәләнеүселәре — ике тапҡыр донъя, өсәр тапҡыр Рәсәй, Европа чемпионы Илшат Әхмәтханов, Рәсәй күләмендә призер булған спортсылар Вадим Садыров, Фаил Шәмсетдинов, Илнар Шәйәхмәтовтар. Улар — районыбыҙ ғорурлығы.

Электән армспортты популярлаштырыу буйынса эште ойошторған Айҙар Хажиев, Фоат Саҙретдиновтарҙың юлын дауам итеп, тренер Илдар Сәхипов менән берлектә эшләп, 2014 йылда Айваз Сафетдинов тәү тапҡыр уҡыусыларҙы Иҙел буйы федераль округында ойошторолған ярыштарға алып сыға. Райондың өлкән спортсылары бындай дәрәжәләге ярыштарға күптән ҡатнашһа ла, мәктәп уҡыусыларының ҙур майҙанда беренсе тапҡыр көс һынашыуы була был. Көслө спортсылар сафы йәнә тулылана. Алмаз Хәбибуллин үҙен Рәсәйҙә өмөтлө спортсы итеп таныта. Ул — өс тапҡыр Рәсәй беренселеге призеры (II, III урындар), һул ҡул менән ярышта Рәсәй чемпионы исемен яуланы (2015 йыл). Европа күләмендә ярыштарҙа ҡатнашып, VI урынға сыҡты. Рәдим Ғәлиуллин 2018 йылда армспорт буйынса Рәсәй чемпионы исемен яуланы.

2017 йылда армспорт буйынса Башҡортостан беренселегендә Тимур Әхмәҙуллин, Рәдим Ғәлиуллин, Эльвина Зиннурова — I, Динар Хижәпов, Ләйсән Сафетдинова, Данил Садыҡов — II, Раил Әхмәтйәнов, Алмаз Яҡупов III урындарҙы яуланы. 2018 йылда Башҡортостан Республикаһының атҡаҙанған физик культура хеҙмәткәре Г. Әғзәмов иҫтәлегенә милли һәм халыҡ спорт төрҙәре буйынса XVII республика фестивалендә Эльнар Шәйәхмәтов, Алмаз Яҡупов еңеүсе булды. Ағымдағы йылда Балтас армспортсылары Чехов ҡалаһында үткән армспорт буйынса Рәсәй беренселегендә уңышлы сығыш яһаны. Башҡортостан йыйылма командаһы бары тик балтастарҙан торҙо! Юниорҙар араһында Данил Садыҡов һәм Азалия Хәмәтнурова Рәсәй чемпиондары булды. Динар Хижәпов — II, Руслан Кашапов, Тимур Әхмәҙуллин, Ләйсән Сафетдинова үҙ ауырлыҡ категорияларында III урындарҙы яуланы.

Балтастар гер һәм армспорт буйынса үҫмерҙәрҙең, йәштәрҙең уңыштарын күҙәтеп, һәр ваҡыт ғорурлана. Был ҡаҙаныштар менән беҙ талантлы егеттәребеҙ — тренерҙарыбыҙ Айваз Сафетдиновҡа һәм Ильяс Шәймөхәмәтовҡа бурыслы. Афарин, егеттәр!