4000-гә яҡын һорау килгән дә

Әлеге ваҡытта Башҡортостан Башлығы Радий Хәбировтың тура эфиры башланды. Уны Башҡортостан юлдаш телевидениеһы, “Рәсәй 24”, “Башҡортостан 24”, “Вся Уфа”, “Сәләм”, UTV, “Юлдаш” радиоһы телеканалдарының тура эфирында ҡарап була. Шулай уҡ тура бәйләнеш трансляцияһын Радий Хәбировтың “Бәйләнештә” һәм “Класташтар” социаль селтәрҙәрендәге сәхифәләрендә лә ҡарарға мөмкин.

Тура бәйләнеште билдәле журналистар: “Башинформ” мәғлүмәт агентлығының баш мөхәррире Руслан Шәрәфетдинов менән билдәле алып барыусы Наил Юнысов алып бара.

Һорауҙы төбәк етәксеһенә “Башҡортостан Башлығының тура бәйләнеше” телеграм-боты, “Дәүләт хеҙмәттәре” порталында йәки республика Башлығының рәсми сайтындағы махсус бүлек аша бирергә мөмкин.

Башлыҡтың халыҡ менән туранан-тура аралашыуы – йыл һайын иң көтөп алынған сәйәси һәм ижтимағи сара. Ул йыл аҙағында үткәрелә һәм ағымдағы йылға йомғаҡтар ҙа яһала. Әлеге аралашыуға, Радий Фәрит улы әйтеүенсә, 4000 самаһы һорау килгән дә.

– Тура бәйләнешкә яҡшы, эш кәйефе менән килдем. Беҙ уны, ғәҙәттәгесә, декабрҙә үткәрәбеҙ. Республика халҡының һорауҙары күп йыйылғандыр, тип уйлайым, уларҙың барыһына ла тура эфир барышында яуап биреп өлгөрөп булмаясаҡ. Ләкин уларҙың барыһы ла эшкә алынасаҡ тип ышандырырға теләйем, – тине Радий Хәбиров.

Тәүге һорау дәүләт етәксеһе Владимир Путин менән бәйле булды. Журналистар уның һуңғы тапҡыр Өфөгә “Рәсәй - спорт державаһы” форумы сиктәрендә, октябрь аҙағында ғына килеүен әйтте. Радий Хәбиров планлаштырылған объекттар буйлап йөрөгәндә ваҡытты республиканың ҡаҙаныштары хаҡында һөйләр өсөн минут һайын файҙаланырға тырышыуы хаҡында әйтте.

– Һөйләшеү тыныс булды. Дәүләт башлығын Башҡортостан батальондары ҡыҙыҡһындырҙы. Ул махсус хәрби операцияла ҡатнашыусыларға артабан да ярҙам итеүебеҙҙе һораны. Шулай уҡ Рәсәй Президенты ауыл хужалығы үҫешенә һәм ашығыс ярҙам хеҙмәте фельдшерҙары менән тәьмин итеүгә бәйле бер нисә иҫкәрмә яһаны. Дөйөм алғанда, һөйләшеү республикабыҙ тормошона, уның бөтә яҡтарына ла ҡағылды. Бик ихлас һәм иғтибарлы кеше, - тип йомғаҡ яһаны Радий Хәбиров.

Фото: "Башинформ".