Аҡ халатлы йәш белгестәр

 Башҡортостанда ауыл ерҙәрендә, эшсе ҡасабаларҙа йәшәгән дәүләт һәм муниципаль учреждение белгестәренә социаль ярҙам саралары ла күрһәтелә. Был йәһәттән педагогия, медицина һәм фармацевтика, мәҙәниәт һәм сәнғәт, социаль хеҙмәткәрҙәр, физик культура һәм спорт тармағы белгестәре тураһында хәстәрлек ҡаралған. 
Башҡортостанда  “Ауыл табибы”, “Ауыл уҡытыусыһы”, “Ауыл тренеры”, “Ауыл мәҙәниәт хеҙмәткәре” кеүек федераль һәм республика программалары эшләп килә. Ауыл хеҙмәткәрҙәренә ярҙам күрһәтелеүе һөҙөмтәһендә йәш белгестәргә тыуған ауылдарында төпләнергә, яратҡан эштәре менән шөғөлләнергә мөмкинлек барлыҡҡа килә. ”Ауыл табибы”, “Ауыл фельдшеры”, “Дефицитлы белгеслектәр” кеүек проекттар 296 хеҙмәткәргә 2023 йылда компенсация түләүҙәре алырға мөмкинлек бирҙе.
Медицина хеҙмәткәрҙәренең етмәүе элек-электән районыбыҙҙа ла һиҙелә. Был мәсьәләне хәл итеүҙә “Ауыл табибы” программаһы ярҙам итә. Мәҫәлән, 2019 йылдан алып бөгөнгә тиклем 15 табип ошо проект буйынса Борай үҙәк район дауаханаһына эшкә ҡайтҡан.

“Ауыл табибы” — медицина белгестәрен ауыл еренә һәм 50 меңгә тиклем халҡы булған ҡалаға күсенергә этәреүсе программа. Ул йыраҡ ауылдарҙа һәм ҡалаларҙа табиптар ҡытлығын бөтөрөүгә, шулай уҡ медицина ярҙамынан файҙаланыу мөмкинлеген арттырыуға йүнәлдерелгән.
Борай үҙәк район дауаханаһына “Ауыл табибы” проекты буйынса 2019 йылда өс табип — Эльза Гәрәева, Гөлшат Мөбәрәкшина, Регина Кашапова эшкә ҡайтты. Табип-анестезиолог-реаниматолог Эльнар Саҙретдинов 2020 йылда “Дефицитлы белгеслектәр” проекты буйынса эшләй башланы.
2021 йылда терапевтар Алһыу Мусина, Светлана Шәмсетдинова, табип-офтальмолог Римма Абазова “Ауыл табибы” проектына ҡушылып, пациенттарға һауығырға ярҙам итә.

Быйыл иһә үҙәк район дауаханаһына биш йәш белгес ҡайтты. Алмаз Латыпов табип-эпидемиолог вазифаһын башҡара, Ирина Нуриәхмәтова, Лилиана Хәбибуллина һәм Гөлшат Шакирова, уҡыуҙарын тамамлап, дауаханаға терапевт булып килде. Ә Лилиана Билалова балаларҙы яратҡанға, Башҡорт дәүләт медицина университетының педиатрия факультетын тамамлаған. Улар йәш белгес булараҡ, “Ауыл табибы” программаһы буйынса дәүләт ярҙамы алыуға сират тора.
— Минең өләсәйем дә, апай-ағайҙарым да ошо дауаханала эшләне. Өләсәйем оҙаҡ йылдар шәфҡәт туташы булды. Табиптар династияһын дауам итеп, мин улар эҙенән барам. Тыуған ауылыма ҡайтып, эшкә урынлашыуыма бик шатмын. Коллектив яҡшы ҡаршы алды, өлкән апай-ағайҙар ярҙам итеп тора, барыһы ла булыша, кәңәш бирә. Йәш белгестәргә ярҙам итеүе өсөн республика Башлығына рәхмәтем сикһеҙ, — ти Ижау дәүләт медицина академияһын тамамлап, үҙәк район дауаханаһына терапевт булып эшкә ҡайтҡан Гөлшат Шакирова.

"Әгәр ҙә Башҡортостан дәүләт медицина университетын тамамлаусыларҙың барыһы ла беҙҙең дауаханаларға, поликлиникаларға, ФАП-тарға эшкә килһә, беҙҙә табиптарға ҡытлыҡ булмаҫ ине. Шуныһы борсой, сығарылыш уҡыусыларының күбеһе белгеслек буйынса эшләмәй, ә ҡайһы берҙәре шунда уҡ шәхси медицинаға китә. Күптән түгел федераль кимәлдә ҡабул ителгән медицина ВУЗ-ын тамамлағандан һуң мәжбүри эшләү тураһындағы ҡарарҙар белгестәрҙе һаулыҡ һаҡлау учреждениеларына беркетергә мөмкинлек бирәсәк. Әммә мин һәр ваҡыт медицина колледждарын тамамлаусыларға иғтибар итергә тәҡдим итәм, — тине Радий Хәбиров. — Минеңсә, колледждан һуң шәфҡәт туташы, фельдшер, лаборант булып эшләгән кешеләр бер ҡасан да медицинанан китмәйәсәк. Шуға күрә улар өсөн юғары белем алыу мөмкинлеге тыуҙырырға, уҡыу программаларын синхронлаштырыу тураһында уйларға кәрәк. Шулай уҡ медицина хеҙмәткәре ауылдарҙа ныҡлап урынлашһын өсөн уның тормошон уңайлы итеү мөһим".

Фекер...
Радик Хәсәнов, Борай үҙәк район дауаханаһының баш табибы:
— Республика Башлығы Радий Хәбиров инициативаһы менән медицина өлкәһендә тормошҡа ашырылған проекттар кадрҙарҙы ауыл дауаханаларына ҡайтарыуҙы хуплай. Был программа йәш белгестәр өсөн ҙур терәк һәм таяныс булып тора. Дәүләт тарафынан бүлеп бирелгән финанс ярҙамды торлаҡ һатып алыуға йәки башҡа ихтыяждарға йүнәлтергә мөмкин. Беҙҙең районға ла йәш белгестәр ҡайтыуы һөйөндөрә.

Лира Юрасова.
Борай районы.