Торттар бешереүсе Ирина

Ирина Ноғоманова – районыбыҙҙың Оло Шаҙы ауылы һылыуы. Альберт һәм Рима Фәрхетдиновтар ғаиләһендә икенсе бала булып тыуа. Ата-әсәһен шатландырып, бик уңған, тырыш, аҡыллы булып үҫә ҡыҙ. Ағаһы Илсур, һеңлеһе Илнара менән бик татыу үҫәләр. Йәше еткәс, ауыл мәктәбенә уҡырға керә. Уҡыуҙа ла һынатмай ул – тик “биш” билдәләренә генә өлгәшә, район, республика кимәлендә үткәрелгән олимпиадаларҙа, конкурстарҙа әүҙем ҡатнаша.

Мәктәп йылдарында уҡ Ирина бешеренеү менән мауыға башлай. Белем усағында ойошторолған йәрминкәләргә тәмлекәстәр бешереп сығара. Ә аш-һыуға һөйөүҙе әсәһе тәрбиәләй. Һәр ваҡыт төрлө ризыҡтар әҙерләгән әсәһенә эйәреп Ирина ла аш-һыу серҙәренә төшөнә, тәжрибә туплай.

2010 йылда мәктәпте тамамлап Бөрө ҡалаһының Башҡорт дәүләт университеты филиалына уҡырға инә. Студент йылдарында буласаҡ тормош иптәше Эдуардты осрата. Йәш егет үҙенең иғтибарлылығы, хәстәрлекле булыуы менән Иринаның йөрәген арбай. Хистәренең ныҡлығына инанған йәштәр ғаилә ҡорорға ҡарар итә. Шулай итеп, 2014 йылда гөрләтеп туйҙар яһайҙар. Ноғомановтар ғаиләһен йәмләп, бер-бер артлы сабыйҙар донъяға килә.

Уңған хужабикә декрет ялында үҙенең яратҡан шөғөлөнә ныҡлап тотона. Өфө ҡалаһында оҫталыҡ дәрестәре алып ҡайта. Яратҡан шөғөлө килем табыу ысулына әйләнә. Заказ менән торттар, кекстар бешерә. Уның тәмле торттарын бер ҡабарт ашап ҡараусылар яңынан заказ бирәләр. Әкренләп үҙенең клиенттары барлыҡҡа килә. Ирина оҫтарғандан-оҫтара, рецептарын арттыра бара.

Үҙен күрә ҡатмарлы ғына шөғөлдө үҙ иткән, бешергән һәр тәмлекәсенә күңел йылыһын, бай фантазияһын һалған, ике бәләкәй бала менән бар нәмәгә өлгөргән йәш әсәгә ҡарап һоҡланмау мөмкин түгел!

Лилиә Хәсәнова.