Мишкә районында йәшәүсе Сания апайҙың белмәгән һөнәре юҡ

— Әсәйем, Кәримә Мәлик ҡыҙы, ауылда танылған ҡул эштәре оҫтаһы ине. Иҫ киткес таҫтамалдар, мендәр тыштары, карауат япмаларын сигә, күҙҙең яуын алырлыҡ кофталар, итәктәр бәйләй ине. Иҫемдә, әсәйем янына бәйләм-сигеү серҙәренә өйрәнергә күрше апайҙар инә торғайны. 70-се йылдарҙа магазиндарҙа зауыҡлы, йылы кейем-һалым бик аҙ булды. Әсәйем беҙгә матур-матур башлыҡтар, кофталар, шарфтар, бейәләй, ойоҡтар бәйләп кейҙерә торғайны, — ти Сания апай.

Әсәһенең шөғөлөн Сания Рәлиф ҡыҙы дауам итә. Уҡытыусы эшенең ауырлығына ҡарамаҫтан, яратҡан шөғөлөнә лә ваҡыт таба. Күңел талабы буйынса эшләнгән ҡул эштәре хәҙер уға аҙмы-күпме килем дә килтерә. Хеҙмәттәштәре, таныштары Сания Рәлиф ҡыҙына төрлө кофта, кардиган, шәлдәр бәйләргә заказ бирә.

Ҡул эштәренә һөйөүҙе хеҙмәт уҡытыусыһы София Ялчинова ла тәрбиәләй. Нәҡ ул бәйләм схемаларын уҡырға өйрәтә. Йәш ҡыҙ яңынан-яңы биҙәктәр бәйләү серҙәренә төшөнә. Кейәүгә сығып балалары булғас, уларға йылы кейемдәрҙе үҙе бәйләп кейҙерә. 90-сы йылдарҙағы дефицит ваҡытында был шөғөлө бик ярап ҡала. Ҡайһы ваҡыт магазиндан ҙур бәйләнгән кейем һатып алып, уны һүтеп, теләгән моделдәрҙе яңынан бәйләгән саҡтары ла була.

Әсәнән күргән тун бескән, тиҙәр бит халыҡта, ҡыҙы Гүзәл дә әсәһенә оҡшап оҫта, матурлыҡҡа ғашиҡ. Ул заманса ҡул эштәренә өҫтөнлөк бирә. Тыуған көн һәм юбилейҙарға шарҙарҙан цифрҙар, сәскә, төрлө хайуан һындары эшләй.

— Һәр эшемә күңел йылыһын һалып башҡарам. Кешеләргә эшем оҡшаһа, күңелемә рәхәт, ҡәнәғәтләнеү хисе кисерәм. Матурлыҡты аңлаған кешеләрҙең күңеле изге була. Үҙемдең һәр эшемдән көс алам. Төрлө күргәҙмәләрҙә, оҫталыҡ дәрестәрендә ҡатнашырға яратам, — ти Сания Бикмөхәмәтова.