Асҡында халыҡ йолалары, мәҙәниәте, кейемдәре, уйындары тантана итте

Бөгөн Асҡында “Башҡорт йолалары вариҫтары”  беренсе республика халыҡ ижады фестивале уҙа. Халыҡ йолаларын, ғөрөф-ғәҙәттәрен, үҙенсәлеген   нығытыу һәм үҫтереү маҡсатында ойошторолған  сараға республикабыҙҙың 16 районы һәм Пермь крайынан ике — Ҡуйыҙа һәм Барҙа районы  фольклор коллективтары һәм ғаилә ансамблдәре килде.

Фестиваль сиктәрендә  “Кей” (“Нарядись!”), “Уйын”, “Баһадир” конкурстары,  фольклор коллективтары етәкселәре өсөн “Йола һәм халыҡ уйындары аша телде һәм мәҙәниәтте һаҡлау проблемалары” темаһына түңәрәк өҫтәл  ойошторолдо.

Сараға йыйылыусыларҙы  Асҡын районы хакимиәте башлығының социаль мәсьәләләр һәм  кадрҙар сәйәсәте буйынса урынбаҫары Эльза Ҡәҙим ҡыҙы Әхмәтгәрәева һәм  жюри рәйесе,  Башҡортостан Республикаһының халыҡ артисы, реконструктор, “Амантай”  ижади берекмәһе етәксеһе  Рафаэль Альберт улы Амантаев сәләмләне, фестивалдең маҡсатын аңлатып,   ҡатнашыусыларға уңыштар теләне.

Наилә Имаева.