«Генерал Шайморатов» тарихи романын яҙыу өсөн төп этәргес көс — Бөйөк Ватан һуғышында Тыуған илебеҙ һәм киләсәк быуындар өсөн йәндәрен фиҙа ҡылған ата-бабаларыбыҙҙың рухтары алдында беҙҙең быуындың һәм шәхсән үҙемдең оло бурысымды таныу булды», — ти роман авторы Флүр Ғәлимов. Китап яҙыу өсөн уға һуғыш темаһын, уның сәбәптәрен төптәнерәк, тәрәнерәк өйрәнергә, эҙләнергә тура килгән.
Флүр Ғәлимов — Башҡортостандың һәм Рәсәйҙең Яҙыусылар союзы ағзаһы, Рәсәйҙең һәм Башҡортостандың атҡаҙанған мәҙәниәт хеҙмәткәре, Рәсәйҙең Ҙур әҙәби премияһы һәм Валентин Катаев исемендәге премия лауреаты. Яҙыусының башҡорт әҙәбиәтен яңы темалар, геройҙар менән байытҡан «Яңы башҡорт» романы һәм «Аҙғын тәүбәһе» трилогияһы республика тәнҡитселәренең һәм Рәсәй әҙәбиәтселәре Лев Аннинскийҙың, Чечняның халыҡ яҙыусыһы, Чечня Фәндәр академияһы академигы Канта Ибраһимовтың һәм башҡаларҙың юғары баһаһын алды.
«Ағиҙел» журналының әлеге һанында Миңлеғәле Шайморатовҡа арналған башҡа материалдар ҙа урын алған. Атап әйткәндә, Совет майҙанында ҡуйылырға тейешле һәйкәл проекты тураһында мәғлүмәт, Рәсәй Геройы Йондоҙоноң фотоһүрәттәре.
https://www.bashinform.ru/news/1634436-v-ufe-izdan-roman-o-legendarnom-komdive-general-shaymuratov/