Уҡытыусылар Әдисә Мәғдән ҡыҙы Ғилмийәрова менән Эльза Тимерша ҡыҙы Йосопова уҡыусыларҙы һәм уларҙы оҙатып килгән ата-әсәләрҙе ихлас ҡаршы алды. Йәйге ялдан балалар белем усағын һағынып килгән: уҡытыусыларға, класташтарына яңылыҡтарын һөйләй, дәреслектәрен, дәфтәрҙәрен барлай, ағымдағы ремонттан һуң яҡтырып, матурланып киткән кластарҙы ҡарай.
Әдисә Мәғдән ҡыҙы барыһын да Белем көнө менән тәбрикләп, уҡыусыларға Фән һәм технологиялар йылына арналған класс сәғәте үткәрҙе, уларҙы яҡшы уҡырға, киләсәктә илебеҙҙең ышаныслы, белемле егет һәм ҡыҙҙары булырға саҡырҙы. Уҡыусылар үҙ сиратында тырышып уҡырға, тәртипле булырға һүҙ бирҙе.