Балтас районы Штәнде ауылында мөһабәт бина — урта мәктәп төҙөлөп бөттө!

Яңы бина асылыуҙы байрам итеүселәр килгән ҡунаҡтарҙан, шулай уҡ мәктәпте тамамлаусы уҡыусыларҙан бихисап бүләктәр ҡабул итте. Ағымдағы йылда мәктәпкә Рәсәйҙең мәғариф алдынғыһы, оҙаҡ йылдар ошо белем усағында директор булып эшләгән Әниф Әкрәмовтың исеме бирелде. Әниф Әкрәм улының ҡыҙы, медицина фәндәре кандидаты Гөлшат Ғаязова яҡташтарын ҡотлап, изге теләктәрен, һөйөнөсөн еткерҙе.
Төҙөүселәрҙән символик асҡысты Штәнде урта мәктәбе директоры Лениза Нуртдинова ҡабул итеп алды. Яңы мәктәптә белем аласаҡ бәхетле балаларҙың сәләмләү һүҙҙәре һәм тәүге ҡыңғырау сыңы аҫтында ҡунаҡтар бина буйлап экскурсияға үтте. Балаларға белем һәм тәрбиә биреү өсөн бирелә барлыҡ уңайлыҡтар ҙа бар. Уҡыу кабинеттары, спорт залы, йорттағы спорт майҙандары, аш бешереү блогы замананың һуңғы талаптарына ярашлы йыһазландырылған. Мәктәптә тыуҙырылған шарттарҙы күреп, бында белем аласаҡ балалар өсөн шатланмай мөмкин түгел. Бинаның дизайны ла бик матур: ул әллә ҡайҙан күренеп, ауыл башынан балҡып, үҙенә тартып тора. Ауыл халҡы был объектты ҙур бүләк итеп ҡабул итте һәм республика Башлығы Радий Хәбировҡа, район етәкселегенә, төҙөүселәргә ихлас рәхмәт һүҙҙәрен юлланы.
Иҫке Уразай ауылында һәйкәлдәр асылды
Хөрмәтле ҡунаҡтар был көндө тағы ла бер тантанала ҡатнашты. “Урындағы башланғыстарҙы яҡлау программаһы” буйынса уразайҙар башҡарған эш һоҡланғыс һәм ғорурланырлыҡ: ауыл уртаһында Бөйөк Ватан һуғышы йылдарында илебеҙ азатлығы өсөн башын һалған, еңеү яулап ҡайтҡан яугирҙарға, ауылдан фронтҡа киткән 10 ҡатын-ҡыҙ араһынан тыуған еренә ҡайта алмай ҡалған, яралыларҙың ғүмерен һаҡлап, немец танкы ҡаршыһына граната менән ташланған Мөнәүәрә Фазылбәковаға, Әфған ерендә интернациональ бурысын үтәгәндә батырҙарса һәләк булған Фиданис Ғәлимовҡа һәйкәлдәр ҡалҡып сыҡты. Уларҙың ансамблен булдырыуға ауыл биләмәһе башлығы Рәзиф Ахунов һәм урта мәктәп директоры Марат Закиров етәкселегендә барлыҡ ауыл халҡы, яҡташтар ҙур көс һалды.
Район хакимиәте башлығы Илгиз Субушевтың, Айбулат Вәкил улы һәм Әлфис Суфиян улының тулҡынландырғыс һүҙҙәре тантанаға йыйылған ауыл халҡының кисерештәре менән ауаздаш булды.
Милли кейем көнөндә — ҙур күргәҙмә
Мәртәбәле ҡунаҡтар район буйлап эш сәфәрен Милли кейем көнөнә бағышланған байрамда тамамланы. Күргәҙмәлә ауыл биләмәләрендә йәшәүсе төрлө милләт вәкилдәре үҙҙәренең мәҙәниәте, кейем, тел, йыр-бейеү, аш-һыу үҙенсәлектәре менән таныштырҙы, эшҡыуарҙар, оҫталар теккән-сиккән, етештергән әйберҙәрен тәҡдим итте. Район хакимиәте башлығы Илгиз Субушев башҡорт, рус, татар, удмурт, мари милләттәренең ғөрөф-ғәҙәттәрен һаҡлауға күп көс һалған Асия Мостафина, Николай Кашин, Камилә Халиҡова, Лидия Пукрокова, Әлфинә Алексееваны, район тормошона иғтибар күрһәткән, Айбулат Хажин һәм Әлфис Ғаязовты, райондағы һәр башланғыстың бағыусыһы, район территорияһын газлаштырыуҙың башланғыс стадияһында ҙур ярҙам күрһәткән Нурихан Дилмиевты “Балтас районына — 90 йыл” иҫтәлекле миҙалы менән бүләкләне.
“Ғаилә” паркы асылды!
“Уңайлы ҡала мөхите булдырыу” программаһы сиктәрендә резина ҡапламлы майҙансыҡ, тренажерҙар урынлаштырылған спорт майҙансығы, уңайлы эскәмйәләр, тротуарҙар йәйелгән, видеокүҙәтеү, яҡтыртыу системаһы булған бындай парк балтастарҙың күптәнге хыялы ине һәм ул, ниһайәт, тормошҡа ашты. “Ғаилә” паркын булдырыуға ете миллион һумдан артыҡ аҡса һалынған. Төҙөлөш эштәрен “Агропродукт” яуаплылығы сикләнгән йәмғиәте башҡарҙы. Парк Иҫке Балтас ауылының нәҡ үҙәгендә, мәсет һәм һәйкәлдәр менән йәнәшә урынлашҡан. Яҡында ғына мәктәп һәм Мәҙәниәт һарайы.
— Һоҡланғыс урында урынлашҡан беҙҙең яңы парк. Йәнәшәлә генә мәсет. Райондаштарыбыҙ уны игелеккә файҙаланыр, — тине подрядсы ойошма етәксеһе Марат Хәйруллин.
Ата-әсәләр, олатай-өләсәйҙәр был яңылыҡты айырыуса шатланып ҡабул итте. Бирелә көн оҙоно сабыйҙарҙың шат тауышы өҙөлмәй.
Балалар өсөн уйын ҡоролмаһы Тау урамында ла бар. Ул “Агропродукт” йәмғиәте тарафынан күп фатирлы йорт алдында “Башҡортостан ихаталары” республика программаһы сиктәрендә башҡарылды: балалар өсөн резина ҡапламлы уйын майҙансығы, сүп һауыттары, эскәмйәләр урынлаштырылды, автомобилдәр өсөн туҡтау урыны, тротуар булдырылды, был урын яҡтыртылды, йәшелләндерелде, видеокүҙәтеү аҫтына алынды.
— Был эштәр район халҡы өсөн эшләнә. Ҡоролмаларҙы төҙөк килеш һаҡлаһағыҙ, ҡәҙерен белһәгеҙ ине, — тип мөрәжәғәт итте район хакимиәте башлығы Илгиз Субушев йортты асыу тантанаһында һәм бирелә йәшәүселәргә подрядсы ойошманың бүләктәрен — футбол туптары тапшырҙы.
Сабыйҙарҙың хәүефһеҙлеген ҡайғыртып йомшаҡ газон йәйеп эшләнгән бәүелсәктәр, шыуып уйнарға тау һәм башҡа йыһаздар урынлаштырылған майҙансыҡ бәхетле ҡыҙ һәм малайҙарҙың шат тауыштарынан гөр килеп тора.
“Балтас һаҙлыҡтары” туризм фестивале
Әлегә тиклем беҙҙең яҡтарға хас булмаған фестиваль күптән түгел Башҡортостан Республикаһы автоспорт федерацияһы тарафынан ойошторолдо. Урындағы әүҙем йәш ир-егеттәрҙең — “Татарпиллер” туристик клубының (әүҙем ағзалары — Илгиз Сәхипов, Марат Хәйруллин) башланғысы район хакимиәте тарафынан хуплау тапты. Фестиваль уҙған йылдың сентябрендә тәүге тапҡыр үткәрелде һәм йәмәғәтселек араһында ҡыҙыҡһыныу уятты. Быйыл трофи-рейдта 14 экипаж ҡатнашты: Пермь, Дүртөйлө, Бөрө ҡалаларынан — икешәр, Өфөнән һәм Ҡыҙыл түбә ҡасабаһынан, Асҡын, Борай райондарынан — берәр, Балтастан — дүрт. Автоспортсылар 40 километрҙан ашыу “юл” үтте: ярыш ике участкаға бүленде. Уҙыштың етәксеһе юғары категориялы судья Евгений Назаров, секретары Альбина Хафизова булды.

Гөлнара Шәймөхәмәтова.
Ғәзим Талипов фотолары.