Туған телгә һөйөү тәрбиәләй

Ул һәр ваҡыт мәктәп тормошоноң уртаһында ҡайнай, төрлө саралар ойоштора, хеҙмәттәштәре менән бергә район күләмендә үткән концерттарҙа һәм спектаклдәрҙә әүҙем ҡатнаша.
Гөлназ Рәмил ҡыҙы — Балтас районы Иҫке Янбай ауылы ҡыҙы. Тыуған ауылында урта мәктәпте тамамлағас, башта — Нефтекама педагогия училищеһында, унан Бөрө дәүләт социаль-педагогия академияһында Башланғыс белем биреү педагогикаһы һәм методикаһы факультетында белем ала. Хеҙмәт юлын 1998 йылда Боғҙан ауылы мәктәбендә башланғыс кластар уҡытыусыһы булып башлай. 2003-2005 йылдарҙа Иҫке Балтас 1-се урта мәктәбендә өлкән вожатый, рәсем дәресе уҡытыусыһы булып эшләй. 2005 йылдың декабренән Гөлназ Рәмил ҡыҙының хеҙмәт биографияһы 2-се мәктәп менән бәйләнгән. Һигеҙ йыл дауамында өлкән вожатый вазифаһында ул барлыҡ тәрбиәүи сараларҙы ойоштороусы булараҡ танылды. 2008 йылда БДУ-ла башҡорт теле һәм әҙәбиәте өлкәһендә һөнәри эшмәкәрлек алып барыу өсөн әҙерлек үтә. Бына 14 йыл юғары категориялы уҡытыусы балаларға башҡорт теле һәм әҙәбиәтенән белем бирә.
Гөлназ Рәмил ҡыҙы үҙ эшен яратып башҡара, алдынғы методикалар һәм алымдар ҡуллана, дәрестәрен ижади яҡтан байытыуға, балаларҙа патриотик рух, туған телгә һөйөү тәрбиәләүгә ҙур иғтибар бирә. Уҡытыусы үҙенең белемен даими камиллаштыра. Башҡортостан Республикаһының Мәғарифты үҫтереү институтында мәғлүмәти-коммуникатив технологияларға өйрәнә, квалификацияһын арттырыу буйынса уҡый. Тырыш уҡытыусының һөҙөмтәләре лә бихисап: уҡыусылары “Һаумы, һаумы, әкиәт!”, “Урал батыр” йәш сәсәндәр, “Республикамды данлайым” иншалар конкурстарының муниципаль этаптарында, “ГЛОБУС” халыҡ-ара олимпиадаларында призлы урындар яуланы.
Гөлназ Әнүәрова директорҙың тәрбиәүи эштәр буйынса урынбаҫары вазифаһын да һуңғы һигеҙ йылда намыҫ менән башҡара. Ағымдағы йылдың һуңғы уҡыу сирегендә уҡытыусы балаларға дистанцион белем бирҙе. Был өлкәлә лә һынатманы уның уҡыусылары, йылды яҡшы билдәләргә тамамланы.

Автор; Гөлнара Шәймөхәмәтова.