+2 °С
Болотло
Бөтә яңылыҡтар
10
Мәғариф
18 Июль 2019, 14:05
Өмөттәребеҙ аҡланды
Мишкә районы.Мишкә районының 121 сығарылыш класс уҡыусыһы 27 майҙан 13 июнгә тиклем Берҙәм дәүләт имтихандары тапшырҙы. Уның һөҙөмтәләре күптән инде билдәле. Бөгөн уҡыусылар юғары уҡыу йорттарын һайлау, документ тапшырыу менән мәшғүл. БДИ һөҙөмтәләре тураһында мәғариф бүлеге начальнигы Сергей Александров менән әңгәмәләштек.
– Сергей Андреевич, БДИ һөҙөмтәләре тураһында нимәләр әйтерһегеҙ?
– Имтихандар тапшырыу өсөн районда бер пункт, Ф. Бүләков исемендәге 1-се лицей эшләне. Унда туғыҙ аудитория йыһазландырылды, 25 ойоштороусы, 15 аудиториянан тыш ойоштороусы һәм биш техник белгес йәлеп ителде. Һәр аудитория видеокүҙәтеү аҫтында булды, имтихан барышын Мәскәүҙән, Өфөнән һәм башҡа төбәктәрҙән онлайнкүҙәтеүҙән тыш, видеояҙма алып барылды, телефон бәйләнешен томалағыстар урынлаштырылды. Әлбиттә, былар барыһы ла имтихандарҙы ғәҙел һәм асыҡ, тәртип боҙоуҙарһыҙ үткәреүгә булышлыҡ итте.
– Быйылғы сығарылыш класс уҡыусылары ниндәй фәндәргә өҫтөнлөк бирҙе?
– Быйылғы уҡыу йылында 11 фән буйынса имтихан үткәрелде. Рус теле һәм математиканы барыһы ла тапшырҙы. Ә һайлау буйынса иң популяр фәндәр булып йәмғиәтте өйрәнеү (32 кеше), биология (30 кеше), химия (28 кеше) һәм физика (20 кеше) булды.
– Берҙәм дәүләт имтихандарының һөҙөмтәләре нисек?
– Дөйөм алғанда, быйылғы һөҙөмтәләр шатландырҙы. Район буйынса ике сығарылыш класс уҡыусыһы иң юғары 100 балл йыйыуға иреште: Мишкә 2-се урта мәктәбенән Тимур Дигитаев — физика һәм Ирсай урта мәктәбенән Александр Исаметов химия фәненән.
Шулай уҡ 90 балдан юғары эшләгән уҡыусылар менән ғорурланабыҙ. Математика, рус теле, информатиканан — дүртәр, физиканан — ике, химиянан бер уҡыусының һөҙөмтәләре 100 балға бик яҡын. Был балаларҙы әҙерләгән педагогтарға сикһеҙ рәхмәтемде белдерәм.
– Тулы яуаптарығыҙ өсөн рәхмәт. Егет һәм ҡыҙҙарға һайлаған уҡыу йорттарына уңышлы инеүҙәрен теләйбеҙ.
Читайте нас:
