Йәш һатыусылар һынатманы

Район мәктәптәренең уҡыусылар коллективтарын берләштереү, уларҙы тәжрибә һәм тикшеренеү эшмәкәрлегенә ылыҡтырыу, тапшырылған эш өсөн яуаплы ҡараш тәрбиәләү маҡсатында Асҡында район Мәҙәниәт йорто территорияһында “Көҙ-2017” мәктәп йәрминкәһе үтте. Унда 17 дөйөм, район үҙәгенең өс мәктәпкәсә белем биреү учреждениеһы һәм “Мельница” балалар ижады үҙәге ҡатнашты. Уҡыусылар халыҡҡа йәшелсә-емеш, үҙ ҡулдары менән эшләнгән әйберҙәр, һөт продукттары, ҡамыр ризыҡтары, ағас үҫентеләре һәм башҡа бик күп нәмәләр тәҡдим итте. Улар көсө менән әҙерләнгән бай йөкмәткеле концерт сараға йәм өҫтәне.