Батырҙар исеме мәңгелек

Матур йолаға әйләнгән был сара Еңеү көнө алдынан быйыл 12-се тапҡыр ойошторолдо.

Ярышта Асҡындың 1-се һәм 2-се, Иҫке һәм Яңы Ҡаҙансы, Урмияҙ, Ҡышлауйылға мәктәптәренән барыһы 64 уҡыусы ҡатнашты. Сара башланыр алдынан Советтар Союзы Геройы Сәлимйән Ғәлимйән улы Ғәлимйәновты бер минут тын ҡалып иҫкә алдылар. Утты-һыуҙы кискән яҡташыбыҙҙың яу һәм тормош юлдары хаҡында һөйләнеләр.

1-4, 5-8, 9-11 класс уҡыусылары айырым төркөмдәргә бүленеп ярышты. Сәләмәтлектәре сикле балалар ҙа айырым көс һынашты. Еңеүселәр һәм призерҙар Балалар-үҫмерҙәр спорт мәктәбенең Почет грамоталары һәм миҙалдары менән бүләкләнде.

1-4 кластар араһында Асҡын 1-се мәктәбенән Рәмзил Әхмәтов менән Иҫке Ҡаҙансынан Рәмилә Әхмәтғәлиева еңеү яуланы. 5-8 кластар араһында Асҡын 2-се мәктәбенән Илмир Сәйетовҡа һәм Асҡын 1-се мәктәбенән Камилә Хисмәтуллинаға етеүсе булманы. 9-11 кластар араһында Айнур Шакиров менән Алина Абдуллина алдынғылыҡты бирмәне.

- Ярыштар ҙур ойошҡанлыҡ менән уҙҙы. Йыл һайын ҡатнашыусылар һаны ла арта бара. Тәүге йылдарҙа 30 йәш шахматсы булһа, бөгөн иһә – 60! Әлбиттә, был ҡыуаныслы күренеш, - ти Балалар-үҫмерҙәр спорт мәктәбе директоры урынбаҫары Рөстәм Тимерғәли улы Әбдрәхимов.

Наилә Имаева.