Бөтә яңылыҡтар
Хәтер
23 Июнь 2020, 01:30

«Яугирҙарҙы иҫкә алып...»

Иҫке Ҡаҙансы төбәге ағинәйҙәрен етәкләүсе Мәмдүнә Ғаян ҡыҙы Зарипованың Хәтер һәм ҡайғы көнөнә бағышлап яҙған шиғырын һәм иҫтәлектәрен түбәндәге һылтанма буйынса инеп уҡый алаһығыҙ:

- 22 июнь – тарихта иң ҡайғылы һәм фажиғәле дата. Был көндө беҙ яуҙа һәләк булған һәм һуғыштан Еңеү менән ҡайтып, шулай уҡ тылда аслыҡтан, ауыр тормоштан мәрхүм булғандарҙың барыһын да хәтергә алабыҙ.
Бөйөк Ватан һуғышы минең ғаиләмде лә урап уҙмаған. Атайым Ғабделғаян Зекриә улы менән уның өс бер туғаны ла яуға китә. Тик атайыма ғына тыуған яғына кире әйләнеп ҡайтырға насип була. Уның ағаһы Барый, ҡустылары Фәтих менән Ғабделхәй һуғышта һәләк була. Уларҙың тормош һәм яу юлдарын өйрәнеп, балаларыбыҙға һәм ейәндәребеҙгә лә изге аманат итеп еткерергә тырышабыҙ. Үҙенең ғүмерен аямай изге бурысын үтәгән, Тыуған иле өсөн баштарын һалғандарҙы бер кем дә онотмаһын ине. Үҙебеҙ белгәнде йәш быуынға еткерәйек, атай-олатайҙарыбыҙҙың батырлығын яҡты иҫтәлек итеп һаҡлайыҡ.Түбәндәге шиғырым да нәҡ ошо хаҡта, - тине Мәмдүнә Ғаян ҡыҙы.
Батырҙарҙы батырҙарса,
Яугирҙарҙы яугирҙарса,
Иҫкә алайыҡ, туғандар,
Бар ҙа яуҙа булғандар.
Улар бит беҙҙең өсөн
Башҡайҙарын һалғандар.
Ҡан ҡойошта алышып,
Яу ҡырында ҡалғандар.
Иҫәндәрҙе иҫкә алырға
Ҡалманы хәҙер береһе.
Хоҙайҙан һорайыҡ уларға
Иман байлығы бирсе.
Һоҡланып ҡарап торабыҙ
Уларҙың портретына.
Рәхмәт әйтеп, баш эйәбеҙ,
Үлгәндәрҙең рухына.
Тыныс ятығыҙ, яугирҙар,
Ожмахтарҙың эсендә.
Һеҙҙең яҡты иҫтәлектәр
Һәр беребеҙҙең хәтерендә.
Зыяраттарға юлдарҙы,
Эҙҙәрҙе юғалтмайыҡ.
Яугирҙарҙы иҫкә алайыҡ,
Наилә Имаева.
Фотолар ғаилә архивынан.
Читайте нас: