"Йәшел Башҡортостан" дөйөм өмә һәм ағас ултыртыу буйынса республика акцияһы районыбыҙҙа аҙна һайын үтә. Был сараларҙың маҡсаты – экология мәсьәләләренә иғтибарҙы йүнәлтеү, ауыл-ҡалалар биләмәһен йәшелләндереү, йәшәгән еребеҙҙе күркәм итеү, экологик хәлде яҡшыртыу.
Сираттағы өмәгә Солтанай ауылы халҡы ла әүҙем ҡушылды. Ауылы яҙмышына, тирә-яҡ мөхиткә битараф булмаған һәр кем ағас ултыртыу эшенең уртаһында ҡайнаны. Был көндө модулле фельдшер-акушерлыҡ пункты территорияһында тиҫтәнән артыҡ ылыҫлы ағас үҫентеһе ултыртылды. Яубүләк ауыл биләмәһе башлығы Флүр Фәнүз улы Әминев өмәлә ҡатнашыусыларға рәхмәт белдерҙе.
Илһөйәр Махатова.