Шимбәлә «Йәшел Башҡортостан» Бөтә Рәсәй ағас ултыртыу акцияһы үткән көндө Солтанай башланғыс мәктәбе йортонда ла өмә гөрләне. Башланғыс класс уҡытыусылары Әдисә Мәғдән ҡыҙы Ғилмийәрова менән Эльза Тимерша ҡыҙы Йосопова етәкселегендә мәктәп йортона ағастар ултыртылды. Өмәлә мәктәп хеҙмәткәре Илдар Ғилмийәров, мәҙәниәт йорто, ауыл биләмәһе хеҙмәткәрҙәре, мәктәп уҡыусылары һәм ата-әсәләр ҡатнашты. Ағас ултыртҡандан һуң бергәләп балалар майҙансығын да сүп-сарҙан таҙартып, матур итеп йыйыштырып ҡуйҙылар.