Яугирҙарҙы хәстәрләп

 Ошо көндәрҙә  Сураш ауылы ҡатын-ҡыҙҙары  ауыл клубына йыйылып, яугирҙар өсөн  туҡмаҫ киҫә. "Был ризыҡ илебеҙ именлеген һаҡлаусыларға  тыуған яҡтарын, өйҙәрен иҫкә төшөрөп,  көс бирһен", — ти улар.

Бындай өмәләр халыҡты берләштерә. Ризыҡ әҙерләгән ваҡытта апайҙар яугирҙарҙың иҫән-һау ҡайтыуын теләп, изге теләктәр юллай һәм  доғалар уҡый.

Шулай уҡ туҡмаҫ менән бергә яугирҙарға  боҙолмай торған башҡа ризыҡтар ҙа ебәрелә.

“Беҙҙең тырышлығыбыҙ ҙа Еңеүҙе яҡынайтырға ярҙам итһен. Иң мөһиме: яугирҙарыбыҙ иҫән-имен булып, тиҙерәк Еңеү менән ҡайтһын!

Беҙҙең  хәстәрлек, изге теләктәребеҙ  һәм бөгөн тыуған йортонан алыҫ булғандарға ярҙам итеү  ниәте менән әҙерләгән  ризыҡтар яҡындарын хәтерләтһен, күңелдәрен йылытһын”, — ти Сураш ауылы ирекмәндәре.

Афарин, сураштар!  Бындай изге эштәр артабан да халҡыбыҙҙы берләштереп, изге башланғыстарға этәргес бирһен!

Наилә Имаева.