Башҡортостан яңы уҡыу йылына әҙер

Республикала яңы уҡыу йылын ярты миллиондан ашыу уҡыусы, шул иҫәптән 41 мең самаһы беренсе класс уҡыусыһы башлай. Бынан тыш, колледждарға 119 меңдән ашыу студент бара, шуларҙың 33 меңе — беренсе курс студенттары. Был хаҡта Хөкүмәттең аҙналыҡ кәңәшмәһендә республиканың мәғариф министры Илдар Мәүлитбирҙин хәбәр итте.

Шулай уҡ уҡыу йорттары ла яңы уҡыу йылын ҡаршыларға әҙер. Башҡортостанда Роспотребнадзорҙың бөтөрөлмәгән күрһәтмәләре булған дөйөм белем биреү ойошмалары юҡ, тине министр.

Уның һүҙҙәренсә, балалар өсөн хәүефһеҙ мөхит булдырыу өсөн Ғәҙәттән тыш хәлдәр министрлығы, Эске эштәр министрлығы, Росгвардия, Роспотребнадзор һәм ата-әсәләр комитеттары вәкилдәре ҡатнашлығында ведомство-ара республика комиссияһы булдырылған. Баһаны 2400-ҙән ашыу белем биреү ойошмаһы алған: мәктәптәр, балалар баҡсалары, колледждар һәм өҫтәмә белем биреү учреждениелары.

Янғын хәүефһеҙлегенә айырыуса иғтибар бирелгән: быйыл янғынға ҡаршы оборонаны нығытыуға 67 миллион һум бүленгән. Министр билдәләүенсә, террорға ҡаршы яҡлау ҙа көсәйтелгән. Ағымдағы уҡыу йылында республика бюджетынан дәүләт мәғариф ойошмаларының террорға ҡаршы яҡланыуын нығытыу өсөн министрлыҡ 90 миллион һум күләмендә аҡса бүлгән, 26 муниципаль берәмеккә шулай уҡ 66 миллион һум күләмендә аҡса бүленгән.

Бынан тыш, террорға ҡаршы һаҡланыуға талаптарҙы көсәйтеү буйынса саралар иҫәбендә 2026 йылдың 1 мартынан 1, 2 һәм 3 категориялы мәктәптәрҙе ике режимлы һаҡ системаһына күсереү тормошҡа ашырыла.

Башҡортостан Башлығы Радий Хәбиров махсус хеҙмәттәргә мәктәптәргә инеү юлдарын, йәйәүлеләр үткәүелдәрен, светофорҙарҙың эшен тикшерергә һәм уҡыу йорттары эргәһендә ташландыҡ транспортты алып ташларға ҡушты.

Министр үткән уҡыу йылына бер аҙ йомғаҡ та яһаны. Республика интеллектуаль ярыштар өлкәһендә ысын мәғәнәһендә алға китеш яһаны. Башҡортостан беренсе тапҡыр Бөтә Рәсәй уҡыусылар олимпиадаһы һөҙөмтәләре буйынса Рәсәйҙең тәүге биш төбәге иҫәбенә инде. Унда ҡатнашыусыларҙың дөйөм һаны миллион кешенән ашып китә. Ярыштарҙың һуңғы этабында 193 уҡыусы төбәк намыҫын яҡлай. Һуңғы биш йылда еңеүселәр һәм призерҙар һаны 78 кешегә тиклем арта.

Быйыл Берҙәм дәүләт имтиханында ла ҙур уңыштарға өлгәшелә. 2026 йылда 100 баллы эштәрҙең рекордлы һаны теркәлгән һәм 210-ға еткән. Республикала бер юлы бер нисә фән буйынса иң юғары балл йыйған сығарылыш уҡыусылары бар — 11 кеше.

Фото: "Башинформ".