Балалы ғаиләләр өсөн яҡшы яңылыҡ

Бөгөн Башҡортостан Башлығы Радий Хәбиров үткәргән Хөкүмәттең аҙналыҡ кәңәшмәһендә балалы ғаиләләргә дәүләт ярҙамының яңы саралары тикшерелде.

Пенсия һәм социаль страховкалау фондының республика бүлексәһе идарасыһы Фәнил Вәхитов хәбәр итеүенсә, төбәктә бала тыуыу һәм тәрбиәләү менән бәйле 264 мең балаға 130 меңдән ашыу ата-әсә берҙәм пособие ала.

Яңы ярҙам саралары араһында – 18 йәшкә тиклемге йәки көндөҙгө бүлектә уҡыған 23 йәшкә тиклемге ике йәки унан күберәк бала тәрбиәләгән эшләүсе ата-әсәләр өсөн йыл һайын ғаилә түләүҙәре. Ул йыл һайын түбән килемле ғаиләләргә уҙған йыл өсөн түләнгән физик шәхестәрҙең килеменә һалымдың бер өлөшөн ҡапларға мөмкинлек бирәсәк, уны ике ата-әсә лә ала ала. Мөһим шарт – алимент буйынса бурыстар, ата-әсә хоҡуғынан мәхрүм итеү йәки сикләү булырға тейеш түгел. Ғаилә түләүенә ғаризаны йыл һайын 1 июндән 1 октябргә тиклем бирергә мөмкин. Республиканың 40 меңдән ашыу кешеһе үҙ хоҡуҡтары менән файҙаланған да инде.

– 2025 йылда йән башына уртаса килеме йән башына йәшәү минимумының бер ярым тапҡырынан артмаған – 23 673 һум, ә мөлкәте билдәләнгән нормативтан артмаған ғаиләләр түләүгә дәғүә итә ала, – тип өҫтәне Фәнил Вәхитов.

Яңылыҡтар иҫәбендә – күп балалы ғаиләләргә бала тыуыу һәм тәрбиәләү менән бәйле айлыҡ пособие тәғәйенләү шарттарын яҡшыртыу.

– 2026 йылдан федераль закон килеме йәшәү минимумы дәүмәленән 10 проценттан артмаған ғаиләләргә түләүҙе рөхсәт итте, – тине Фәнил Вәхитов. – Элек баш тартҡандарҙың барыһына ла ҡарарҙарҙы ҡайтанан ҡараныҡ.

Шуны билдәләп үтәйек: ярҙам саралары ведомство-ара алмашыу сиктәрендә килгән мәғлүмәттәр нигеҙендә Берҙәм үҙәкләштерелгән һанлы платформала билдәләнә.

Башҡортостан Башлығы республика Хөкүмәтенә халыҡ араһында киң аңлатыу кампанияһын ойошторорға ҡушты.

– Мәғлүмәтте кешеләргә еткерергә кәрәк, улар хеҙмәттәрҙе аңлай һәм уңайлы ала алырға тейеш, – тип йомғаҡ яһаны Радий Хәбиров.

Фото: Башҡортостан Башлығы сайты.