Йәш таланттар бер сәхнәлә

Быйылғы фестиваль мөһим темаларға — Рәсәй халыҡтары берҙәмлеге һәм Башҡортостанда иғлан ителгән Ҙур һәм татыу ғаилә йылдарына бағышланды. Был йүнәлештәр сәхнә әҫәрҙәрендә лә асыҡ сағылыш тапты: сығыштар туған телдә яңғыраны, халыҡ әкиәттәре сәхнәләштерелде, дуҫлыҡ, үҙ-ара ярҙам һәм ғаилә ҡиммәттәре темалары күтәрелде.
Конкурста барлығы 16 коллектив ҡатнашты: шуларҙың 13-ө мәктәп, өсөһө мәктәпкәсә учреждениелар. “Шатлыҡ”, “Йәш таланттар”, “Фантазерҙар”, “Умырзая”, “Водевиль” “Семицветик”, “Дуҫлыҡ нурҙары” һәм башҡа коллективтар тамашасыға 25 минутҡа тиклем дауам иткән мини-спектаклдәр тәҡдим итте. Тамашасылар һәр сығышты йылы ҡабул итеп, алҡыштарға күмде.
Конкурс нәтижәләре буйынса Гран-приға Түбән Һикеяҙ урта мәктәбенең “Шатлыҡ” балалар театры лайыҡ булды. Мәктәп коллективтары араһында 1-се дәрәжә лауреат исемен “Театраль донъя” (Иҫке Балтас балалар ижады үҙәге) берекмәһе яуланы, 2-се урын — “Йәш таланттар” (Иҫке Балтас башланғыс мәктәбе) театрына, 3-сө урын “Умырзая” (Иҫке Балтас 2-се урта мәктәбе) һәм “Тамсылар” (Иҫке Балтас 1-се урта мәктәбе) коллективтарына бирелде.
Мәктәпкәсә йәштәге коллективтар араһында еңеүсе булып “Белоснежка” балалар баҡсаһының “Дуҫлыҡ нурҙары” коллективы танылды. 2-се урында — “Семицветик” (“Миләшкәй” балалар баҡсаһы), 3-сө урында — “Ләйсән тамсылары” (Түбән Һикеяҙ ауылының “Ләйсән” балалар баҡсаһы) коллективтары.
“Театраль серпантин” фестивале балалар театрының бөгөн дә әүҙем үҫешеүен, ә йәш быуындың ҙур теләк менән сәхнәгә сығыуын иҫбатланы. Бындай саралар балаларға үҙҙәрен күрһәтеү, сәхнә тәжрибәһе туплау һәм берҙәм команда булып эшләү өсөн ҙур мөмкинлектәр аса.

Фирғәт Нәбиуллин.

Балтас районы.