ҺУРПАЛЫ ВАҠ БӘЛЕШТӘР

Шулай итеп, музыканы тоҡандырып ебәрәбеҙ, матур уйҙарға көйләнәбеҙ һәм йөрәк йылыбыҙҙы һалып байрам ризығы әҙерләйбеҙ!

ҠАМЫР: 1 сынаяҡ ҡатыҡ (ойоған һөт) + әҙ генә йылы һыу (ҡатыҡтың 3/1 өлөшө) + 150-200 гр. аҡ май + 1 йомортҡа + 3-4 аш ҡалағы манный ярмаһы + самалап тоҙ + 1 балғалаҡ соданы һеркәлә һүндереп, ошо ҡатнашманың өҫтөнә ҡоябыҙ. Барыһын да бергә болғап, сама менән он өҫтәп, йомшаҡ ҡына итеп ҡамыр баҫабыҙ. Эслек эшләгәнсе шыптыр эсендә ял итеп ятһын.

ЭСЛЕК: Фарш (йәки ваҡ ҡына туралған тауыҡ ите) + эрерәк туралған 5-6 бәрәңге + 2-3 баш һуған (һутлыраҡ була) + тоҙ, ҡыҙыл борос, тәмләткестәр = барыһын бергә болғайбыҙ.

ҺУРПА: 100 гр. самаһы һыу + ус аяһындай ҡаҙ майы (йәки йылҡы майы) + семтем тоҙ = ҡайнатабыҙ.

Өҫтәрендә бәләкәс кенә уйым ҡалдырып, ваҡ бәлештәр эшләйбеҙ. Бешеп сығыр алдынан һәр береһенә һурпа ҡоябыҙ.

Бешкәс иһә, иретелгән аҡ май менән өҫтәрен буяп та ебәрһәк, бәлештәр ялтырашып, ҡыҙарышып китәсәк! 180-200 градуслы духовкала 30 минут тирәһе бешерергә.

Ныҡ тәмле! Ысын! Ауыҙҙа иреп кенә тора! М-м-м!

Аштарығыҙ тәмле, табындарығыҙ мул, яҡындарығыҙ имен-һау булһын, дуҫтарым!

"Файҙалы кәңәштәр" төркөмөнән