Ҡариҙел районында бер юлы биш кеше һәләк булған

Башҡортостанда ҡот осҡос юл фажиғәһендә биш кеше һәләк булған. Үлемесле авария бөгөн, 9 мартта, Ҡариҙел районында Бөрө — Таҙтүбә — Һатҡы трассаһының 72-се километрында теркәлгән.

Яҡынса мәғлүмәттәр буйынса, «Лада Приора» һәм «Hyundai Solaris» бәрелешкән. Бәрелешеү шул тиклем көслө була, биш кеше урында һәләк була: ике водитель һәм өс пассажир. Төрлө йәрәхәттәр алған тағы ике кешене дауаханаға оҙаталар.

Урында Дәүләт автоинспекцияһы хеҙмәткәрҙәре һәм эксперт-криминалистик үҙәк белгестәре эшләй. Башҡортостан прокуратураһы аварияның бөтә сәбәптәрен асыҡлауҙы контролгә алды.

Водителдәр! Һауа торошо тотороҡһоҙ: ҡар яуа, буран сығып тора. Өҫтәүенә юлдарҙа боҙлауыҡ, "кәлийә" барлыҡҡа килеүе мөмкин. Һаҡ булығыҙ, тиҙлек режимын һаҡлағыҙ, ҡабаланып алдағы транспортты уҙырға тырышмағыҙ - тәүҙә хәүефһеҙлеккә инанығыҙ. 

Фото: БР ДАИ-һы.