Гөмбә ауылы районыбыҙ данын яҡлаясаҡ

Был көндө Асҡын район Мәҙәниәт йортонда байрам һәм ғорурлыҡ мөхите хөкөм итте: бында «Айыҡ ауыл -2025»республика конкурсының муниципаль этабы еңеүселәрен һәм номинанттарын тәбрикләнеләр.

Район хакимиәте башлығы Динис Йосопов барлыҡ ҡатнашыусыларҙы ҡотлап, уларҙың айыҡ йәшәү рәүешен үҫтереүгә индергән өлөшөн  юғары баһаланы һәм  халыҡ проектының мөһимлеген билдәләп,  конкурста ҡатнашҡандарҙың барыһына ла рәхмәт белдерҙе. Динис Рәдис улы еңеүселәргә һәм ҡатнашыусыларға Рәхмәт хаттары һәм аҡсалата сертификаттар тапшырҙы.

Төп бүләк  —Гран-приға һәм 50 мең һумлыҡ сертификатҡа Гөмбә  ауылы лайыҡ булды. Нәҡ улар  районыбыҙ намыҫын республика кимәлендә яҡларға, тормошҡа сәләмәт һәм аңлы ҡараш өлгөһөн күрһәтергә тейеш.

 «Бәләкәй тораҡ пункттар» категорияһында беренсе урынды Сат ауылы яуланы. Икенсе урынды Арбаш һәм Яңы Ҡара ауылдары бүлеште, ә өсөнсө урынға  Солтанай ауылы сыҡты.

«Урта тораҡ пункттар»  араһында Ҡышлауйылға ауылы иң яҡшыһы була, унан һуң Солтанбәк һәм Үршиҙе ауылдары килә.

«Ҙур тораҡ пункттар» категорияһында призлы урын Ҡубияҙ ауылына бирелде.

Конкурс номинанттары булған башҡа тораҡ пункттар ҙа иғтибарһыҙ ҡалманы һәм биш мең һумлыҡ сертификаттар менән билдәләнде.

Беҙ Гөмбә  ауылы халҡына  ысын күңелдән уңыштар теләйбеҙ һәм республика этабында  ла уларҙың еңеүенә ышанабыҙ! Алға һәм тик алға!

Наилә Имаева.