Ноябрҙә ҡар ятмаҫ...

Башҡортостанда һауа торошо ғәжәпләндереүен дауам итә: әлегә республиканың бер өлөшөндә ҡар яуа, икенсеһендә — ямғыр һәм плюслы температура. Әммә республика бындай сәйер катаклизмдарға ҡағылған берҙән-бер төбәк түгел. "Башҡортостанда әлеге һауа торошо бөтә Рәсәй тигеҙлегендә булған хәлгә оҡшаш (Рәсәйҙең Европа өлөшө), унда ноябрь башынан алып аномаль йылылыҡ күҙәтелә, ул климат үҙгәреүе тураһында һөйләй һәм улар көндән-көн анығыраҡ күренә бара”, – тип һөйләгән “Метео” үҙәге етәксеһе Александр Шувалов.

Шулай килеп сыға: ҡыш ҡыҫҡара, ә йылы һауа торошо һәм плюс температура менән осор арта. Хәҙер ҡыш алды ваҡыты ноябрь уртаһынан декабрь башына сигенә.

Алдағы биш-ун көндә һауа торошо еңел булмаясаҡ: Александр Шувалов ике йылыныу һәм ике һыуыныу фаразлай. Минуслы температураны 13-14 һәм 16-17 ноябрҙә көтөргә кәрәк.

Был көндәрҙә төндә -5, -6 градусҡа тиклем һәм көндөҙ 0 градус тирәһе буласаҡ. Ә һуңынан атмосфера ҡатламдарының тиҙ күсеүе температураның төндә лә ыңғай күрһәткестәргә күтәрелеүе менән алмашынасаҡ. Ноябрҙең икенсе декадаһы аҙағына тиклем яуым-төшөмдөң күп булмауы көтөлә.

Ә ҡарҙы ҡасан көтөргә? Александр Шувалов әйтеүенсә, ул, фараздар буйынса, ноябрҙең өсөнсө декадаһында (24-нән һуң) төшәсәк, әммә тотороҡло ҡар ҡатламы, моғайын, декабрь башында буласаҡ.

"Был ғәҙәти түгел: ғәҙәттә тотороҡло ҡар ҡатламы ноябрҙең икенсе яртыһында барлыҡҡа килә — климат буйынса шулай, әммә быйыл түгел”, — тип йомғаҡ яһай синоптик.

Фото: Әлиә Хужәхмәтова.