Быйыл Рәсәйҙә ҡыш ниндәй булыр?

Киләһе ҡыш алдағыһынан һалҡыныраҡ булыуы ихтимал. ТАСС агентлығына Рәсәй Гидрометүҙәгенең ғилми етәксеһе Роман Вильфанд ошондай фараз биргән.

Дөйөм алғанда, 2025-2026 йылдарҙың ҡышы һыуыҡтар менән айырылмай, әммә үткәне менән сағыштырғанда һалҡыныраҡ буласаҡ. Вильфанд фекеренсә, ҡыш дөйөм алғанда климат нормаһына яҡын һәм унан да юғарыраҡ торасаҡ. Синоптик мәғлүмәттәре буйынса, алдағы декабрҙә Рәсәйҙең бөтә территорияһында тиерлек температура 2024 йылға ҡарағанда түбәнерәк төшәсәк, әммә күп йыллыҡ күрһәткестәргә яҡын буласаҡ. Норманан түбән Алыҫ Көнсығыш федераль округының төньяҡ-көнсығышында ғына һыуыта.

Ғинуар шулай уҡ, метеоролог һүҙҙәренсә, күп йыллыҡ температура нормаһын үтәйәсәк. Шуға ҡарамаҫтан, Рәсәйҙең Европа өлөшөнөң күпселек өлөшөндә, Урал һәм Себер федераль округтарының үҙәгендә һәм көньяғында йыл башы 2025 йылға ҡарағанда күпкә һалҡыныраҡ була.

Февралдә уртаса температура Үҙәк һәм Көньяҡ федераль округтарҙың көнсығышында, Волга буйының күпселек төбәктәрендә, Уралда һәм Себерҙең көнбайышында норманан артасаҡ. 2025 йылға ҡарағанда февраль Рәсәйҙең көньяғының күпселек өлөшөндә йылыраҡ, ә Красноярск крайының төньяғында һәм Якутияның көнбайышында һалҡыныраҡ була.

Бынан алдараҡ Роман Вильфанд Рәсәйҙә бығаса булмаған һыуыҡ ғинуар фаразлағайны. Метеоролог белдереүенсә, 2026 йыл башында температура норманан 4 градусҡа түбән төшәсәк, ә уҙған быуат уртаһы һәм аҙағы күрһәткестәре менән сағыштырғанда — 6-7 градусҡа.

Фото: Әлиә Хужәхмәтова.