Автобусҡа өлгөргән, тик өйөнә ҡайтып етмәгән...

25 йәшлек Илсинә Юлыеваның туғандары һәм яҡындары хафаға ҡалған: ҡыҙ 21 июлдән бирле бәйләнешкә сыҡмай. Баймаҡ районынан ҡыҙҙы эҙләүгә полиция хеҙмәткәрҙәре һәм ирекмәндәр ҡушылған.

"КП-Өфө" порталына Илсинәнең яҡын әхирәте Гөлсөм хәбәр итеүенсә, ҡыҙҙы һуңғы тапҡыр Сибай ҡалаһы автовокзалында күргәндәр. Ул автобусҡа ултырып, тыуған ауылы Байышҡа юлланырға тейеш булған. Илсинәнең ата-әсәһе тап ошо ауылда йәшәй.

- Ул Мәскәүҙә эшләй. Сибай аша тыуған яҡтарына ҡайтып бара ине. Ул көндө беҙҙең уртаҡ дуҫыбыҙ Илсинәне автовокзалға алып барған. Сәғәт киске 8-се ярты тирәһендә әхирәтем автобусҡа өлгөрөүе тураһында хәбәр иткән. Шул ваҡыттан бирле бәйләнеш өҙөлгән, өйөнә ҡайтып етмәгән, - тип һөйләгән Сибайҙа йәшәүсе.

Билдәле булыуынса, быға тиклем Илсинә Юлыева оҙаҡҡа юғалғаны булмаған, шуға ла борсоуға ҡалған ҡыҙҙың туғандары полицияға мөрәжәғәт иткән. Тәү сиратта, әлбиттә, ҡыҙҙың ысынлап та Сибай-Баймаҡ автобусына ултырыуын-ултырмауын асыҡларға кәрәк буласаҡ. Ҡыҙҙың әхирәте фаразлауынса, ул тыуған ауылына ҡайтып китмәүе лә ихтимал.

Илсинә Юлыеваның билдәләре: буйы 154 сантиметр, уртаса кәүҙәле, сәстәре асыҡ көрән төҫтә, күҙҙәре ҡара-йәшел. Юғалған көндә аҡһыл комбинезон һәм аҡ кроссовка кейгән булған.

Фото: ЛизаАлерт.

Источник