Аҡсалата түләүҙе арттырыу тураһында закон сығасаҡ

Парламент Рәйесе Константин Толкачев әйтеүенсә, етем һәм ата-әсә ҡарауынан мәхрүм ҡалған балаларҙы тәрбиәләүсе опекундарға һәм попечителдәргә аҡсалата түләүҙәрҙең күләме 16,6 процентҡа артасаҡ. Тейешле сумма быйылғы бюджетта 87 млн һум күләмендә билдәләнгән. Пособие 1 июндән башлап арттырыла.

БР Дәүләт Йыйылышы ү Ҡоролтайҙың матбуғат хеҙмәте шулай тип яҙа:"Өс йәшкә тиклемге баланы аҫраусы опекундарға (попечителдәргә) түләү айына – 10 855 һум, өс йәштән өлкәндәргә 10 439 һум тәшкил итәсәк. Инвалид баланы йәки һаулыҡ мөмкинлектәре сикләнгән өс йәшкә тиклемге баланы ҡарауға бүленгән аҡсаның күләме айына – 13 027 һум, өс йәштән өлкәндәргә 12 526 һум буласаҡ".
Республиканың Ғаилә, хеҙмәт һәм халыҡты социаль яҡлау министрлығы мәғлүмәттәре буйынса, Башҡортостанда етем һәм ата-әсә ҡарауынан мәхрүм ҡалған 9 681 бала иҫәпләнә. Уларҙың 94 проценты тиерлек ғаиләләргә тәрбиәгә тапшырылған.

Фото: автор фотоһы.