Үҙ эшен яратып башҡара

Светлана Шәйхинурова — Яубүләк, Яңы Ҡарткиҫәк һәм Королев ауылдарының хат ташыусыһы. Ауылдаштары уны асыҡ йөҙлө, изге күңелле, ярҙамсыл булғаны өсөн ихтирам итә. Уның бик яуаплы почтальон эшен ҡабул итеп алыуына  10 йылдан артыҡ ваҡыт үткән.

Үҙ эшен яратып башҡарған почтальон көн һайын тиерлек халыҡ араһында. Бигерәк тә гәзит-журналдарға яҙылыу осоро бик яуаплы. Әйткәндәй, матбуғатҡа яҙылыу буйынса планды Светлана Фәнәүи ҡыҙы һәр йылды үтәргә тырыша.

• Үҙ эшемде яратып, оло яуаплылыҡ менән башҡарам. Ауылдаштарыма гәзит-журналдар, пенсия таратыуҙан тыш көнкүреш әйберҙәре лә һатабыҙ, бигерәк тә быға ололар һөйөнөп тороп ҡала. Почта бүлеге етәксеһе хаҡлы ялға китеү сәбәпле, әле уның урынына кеше ҡуя алмайҙар. Шунлыҡтан үҙемдең эшемә башҡа яуаплылыҡ та өҫтәлде. Мин хеҙмәтләндергән ауылдарҙа күберәге оло кешеләр йәшәй, улар, әлбиттә, район баҫмаларына теләп яҙыла, хат ташыусы килгәнен көтөп тора, — ти Светлана Фәнәүи ҡыҙы.

Светлана Фәнәүи ҡыҙы эшен яратып башҡарған хеҙмәткәр ҙә, бәхетле әсәй һәм өләсәй ҙә. Әлфир Таһирйән улы менән бер ул һәм ике ҡыҙға ғүмер биреп, оло тормош юлына сығарғандар. Бөгөн алты ейән-ейәнсәренә ҡыуанып ғүмер итә Шәйхинуровтар.

Илһөйәр Махатова.