Мутлашыусылар аҡса талауҙың тағы ошондай ысулын тапҡан

Мутлашыусылар смартфон экранын демонстрациялау функцияһын тоҡандырыуҙы һорай. Һөҙөмтәлә был функцияны һаҡһыҙ ҡулланып, республикабыҙҙың бер нисә кешеһе 3 миллиондан ашыу һум аҡсаһынан ҡолаҡ ҡаҡҡан.

Өфө ҡалаһының 2-се полиция бүлегенә 85 йәшлек пенсионер мөрәжәғәт итә. Уның һөйләүенсә, уға банк хеҙмәткәре булып  шылтыраталар. Ул мобиль банктың әлеге ҡушымтаһының иҫкереүе һәм яңыһы эшләнеүе тураһында хәбәр итә. Ялған хеҙмәткәр яңыртылған ҡушымтаны ҡуйырға ярҙам итеү маҡсатында пенсионерға мобиль ҡоролмала экранды демонстрациялау фунцияһына тоташырға тәҡдим итә. Мутлашыусы телефонға ситтән инеү мөмкинлеге алыу менән шәхси кабинетына кереп,  уның 1 миллиондан ашыу аҡсаһын билдәһеҙ иҫәптәргә күсерә.

Ошондайраҡ ғариза менән Өфөлә полицияның 9-сы бүлегенә 81 йәшлек пенсионер мөрәжәғәт итә. Ул ҡушымтаны ҡуйыу маҡсаты менән аферистарға үҙенең мобиль ҡоролмаһына инергә рөхсәт бирә һәм  900 мең аҡсаһыҙ ҡала.

Өфөнән 73 йәшлек ҡатын да яуыздар тоҙағына эләгә. Уға шылтыратыусы үҙен кәрәҙле компания хеҙмәткәре итеп таныштыра һәм сим-картаһының эшләү ваҡыты сығыуы тураһында хәбәр итә. Ялған белгес быны ситтән тороп эшләргә кәңәш итә. Зыян күреүсенең шәхси мәғлүмәттәрен алғас, мутлашыусы мобиль банк аша пенсионерҙың 990 мең һумына эйә була. Был факттар буйынса енәйәт эштәре ҡуҙғатылған.

“Һеҙгә шылтыратыусы "белгес"тәргә ышанмағыҙ. Ойошма хеҙмәткәрҙәре клиенттар менән улай бәйләнешкә сыҡмай. Ят кешеләргә мобиль ҡоролмағыҙға экранды демонстрациялау функцияһы аша инергә рөхсәт итмәгеҙ. Был мутлашыусыларҙың ҡулы!” - тип иҫкәртә Башҡортостан буйынса Эске эштәр министрлығы.

Фото: "Башинформ"