“Геройҙар биләмәһе” беренсе тапҡыр үткәрелде

22 сентябрҙә Башҡортостан Башлығы Радий Хәбиров Рәсәй Геройы Максим Серафимов исемендәге “Патриот” паркында “Геройҙар биләмәһе” Беренсе патриотик слетында ҡатнашыусылар менән осрашты. Мәғариф һәм фән, Һаулыҡ һаҡлау, Ғаилә, хеҙмәт һәм халыҡты социаль яҡлау министрлыҡтары менән берлектә “Бәхет биләмәһе” хәйриә фонды ойошторған слетта 270-ләгән кеше – республиканың барлыҡ ҡала һәм райондарынан сәләмәтлек мөмкинлектәре сикләнгән 9-14 йәшлек 137 үҫмер һәм уларҙы оҙатып йөрөүсе ата-әсәләр ҡатнашты. Сарала Башҡортостан Башлығы һаулыҡ мөмкинлектәре сикләнгән балалар өсөн слет уҙғарыуҙың мөһимлеген билдәләне.

Радий Хәбиров Башҡортостанда һаулыҡ мөмкинлектәре сикләнгән балаларҙы реабилитациялау һәм һауыҡтырыу мәсьәләләренә ҙур иғтибар бүленеүен һөйләне. Мәҫәлән, октябрҙә Өфөлә илдә иң ҙурҙарҙың береһе буласаҡ “Салют” республика реабилитация-белем биреү үҙәге асыласаҡ. Унда һаулыҡ мөмкинлектәре сикләнгән балалар өсөн 192 урынлыҡ коррекция мәктәбе, инвалид балаларға дистанциялы алымда белем биреү үҙәге, психолог-педагог, медицина һәм социаль ярҙам үҙәге эшләйәсәк.

– Дөйөм алғанда, Башҡортостанда ҡалаларҙа һәм райондарҙа 18 бүлексәһе булған биш реабилитация үҙәге эшләй, – тип билдәләне Радий Хәбиров. – Беҙ мәҙәни, спорт объекттары төҙөүгә лә ҙур иғтибар бүләбеҙ. Беҙҙең алда һәр районда бассейн булдырыу бурысы тора. Әлегә улар 14 муниципалитетта  юҡ. Яҡшы спорт комплекстары ла бөтә ерҙә лә юҡ әле, ләкин уларҙы төҙөүҙе дауам итәбеҙ. Бынан тыш, 2025 йылда Өфө дәүләт циркын капиталь ремонтлауға тотонасаҡбыҙ. Уны бөтә балалар ҙа көтә.

“Геройҙар биләмәһе” Беренсе патриотик слеты беренсе тапҡыр ойошторолдо. Ул Рәсәйҙәге Ғаилә һәм Башҡортостандағы Һаулыҡ мөмкинлектәре тураһында хәстәрлек йылдарында мөһим сараға әүерелде. Башҡортостан етәкселеге халыҡтың был категорияһына етди иғтибар бүлә. 2019 йылдан йыл һайын республикала һаулыҡ мөмкинлектәре сикләнгән балалар өсөн “Аксаков шыршыһы” һәм “Бәләкәй принцессалар балы” үткәрелә.

“Бәләкәй принцессалар балы”н үткәргәндә һаулыҡ мөмкинлектәре сикләнгән малайҙарҙы “Патриот” паркына саҡырыу идеяһы тыуҙы, – тине  Радий Хәбиров слетта журналистар менән аралашҡанда. – Бөгөн мин уларға бында ни тиклем ҡыҙыҡ булыуын күрҙем һәм дөрөҫ ҡарар ҡабул итеүебеҙҙе аңланым. Слетты даими уҙғарырға, күберәк балаларҙы саҡырырға һөйләштек. Бөгөн беҙ уларға ысын ир-егеттәргә ҡараған кеүек ҡараныҡ. Минеңсә, был улар өсөн бик мөһим.

“Геройҙар биләмәһе” малайҙар өсөн социаль-мәҙәни интеграциялауға һәм социалләштереүгә, үҫеп килгән быуында илһөйәрлек тәрбиәләүгә йүнәлтелгән сара кеүек уйланылған.

Азат Мөхәмәтйәнов фотоһы.

Эльбрус НИҒМӘТУЛЛИН, “Рәсәйҙең иң көслө кешеһе” конкурсында дүрт тапҡыр еңеүсе:

- “Патриот” паркында үткәрелгән “Геройҙар биләмәһе” слеты бик кәрәк. Мин үҙем дә унда командам менән ҡатнаштым, көс экстримы буйынса оҫталыҡ дәрестәре үткәрҙем. Һаулыҡ мөмкинлектәре сикләнгән булһа ла, егеттәрҙең дәрт-көсө ташып тороуы, ихлас булыуы, беҙ алып килгән ҡорамалдарҙы тотоп ҡарарға тырышыуы һоҡландырҙы. Уларға физкультура менән шөғөлләнеү зыянға түгел, киреһенсә, кәрәк.

Егеттәр Паралимпия уйындары чемпиондары менән аралашты, уларҙың спорттағы ҡаҙаныштары тураһында белде. Слетты ойоштороусыларҙың барыһына ла ҙур рәхмәт!