Һайлау участкалары асылды

Бөгөн, 8 сентябрҙә, Асҡын районында 47 һайлау участкаһы ғәҙәттәгесә урындағы ваҡыт буйынса иртәнге сәғәт 8-ҙә Рәсәй Федерацияһы һәм Башҡортостан Республикаһы дәүләт гимндарын башҡарыуҙан эшләй башланы.

Кисә һайлауҙың икенсе көнө һөҙөмтәле үтте - күптәр тауыш биреп өлгөрҙө. Кемдәр һайлауҙа ҡатнашып өлгөрмәгән, борсолмағыҙ, бөгөн һайлау участкаларына килеп, гражданлыҡ бурысығыҙҙы үтәй алаһығыҙ.

Оло йәштәгеләр, инвалидтар, ауыр сирле кешеләр, уларҙы ҡараусылар, шулай уҡ башҡа сәбәптәре булғандар өйҙә тауыш бирә ала. Бының өсөн участка һайлау комиссияһына уның эшләгән көндәрендә, шул иҫәптән һуңғы тауыш биреү көнөндә 14:00 сәғәткә тиклем мөрәжәғәт итергә кәрәк. Шунан һуң ғариза биреүсенең өйөнә тауыш биреү өсөн күсмә йәшник менән комиссия ағзалары килә.

Иҫегеҙгә төшөрәбеҙ, 6, 7, 8 сентябрҙә Башҡортостан Башлығын, шулай  уҡ Асҡын районында  муниципаль район Советына,  Табаҫҡытамаҡ ауыл Советына һәм Урмияҙ ауыл Советына (1-се  һайлау округына өҫтәмә)  депутаттар һайлана.

#ВыбираемГлаву #Выборы2024 #Башкортостан

Наилә Имаева.