Һайлау участкаһында шахмат турниры үтте

Петропавловка ауыл биләмәһендә ике һайлау участкаһы: береһе — Ҡыйғаҙы ауылында, икенсеһе Петропавловкала ойошторолған. Уларға барлығы ете ауыл инә.

Халыҡ һайлауҙың беренсе көнөндә үк бирелә әүҙемлек күрһәтте. Тәүгеләрҙән булып ике участкала ла уҡытыусылар коллективы, ағинәйҙәр, ауыл биләмәһе хакимиәте хеҙмәткәрҙәре һайланы. Оло быуын вәкилдәре лә һәр ваҡыттағыса ҡалышманы. Беренсе тапҡыр һайлаусылар ҙа, махсус хәрби операцияға юлланыусы Марат Туҡтамышевтың күп балалы ғаиләһе лә үҙ тауышын бирҙе.

Шорохов һәм Йырмаялан ауылдарынан халыҡты һайлауға автобус менән алып килделәр.

Петропавловка һайлау участкаһында китапханасы Рина Муллахан ҡыҙы һәр саҡ байрам кәйефе бүләк итергә тырыша. Был юлы ул һайлауға килеүселәр араһында шахмат һәм шашка турниры ойошторҙо.

Илһөйәр Махатова.

Рәүидә Сәйетова фотолары.