+30 °С
Болотло
Общие статьи
6 Сентябрь 2024, 03:00
Асҡын районында һайлау участкалары асылды
Бөгөн, 6 сентябрҙә, Башҡортостанда республика Башлығын, шулай уҡ район һәм ҡала Советтары депутаттарын һайлау буйынса тауыш биреү башланды. Асҡын районында иртәнге 8.00 сәғәттә барлыҡ һайлау участкалары ла үҙ ишеген асты. Әүҙем тауыш биреү башланды. Әйткәндәй, күптәре бик иртә килеп, участка һайлау комиссияһының асылыуын көттө.
Асҡын районында һайлау участкалары асылды
6, 7, 8 сентябрҙә республика Башлығын һайлауҙан тыш, Асҡын районында муниципаль район Советына, Табаҫҡытамаҡ ауыл Советына, шулай уҡ Урмияҙ ауыл Советына (1-се һайлау округына өҫтәмә) депутаттар һайланасаҡ.
Районда тауыш биреүҙе бер территориаль һәм 47 участка һайлау комиссияһы тәьмин итә.
Шулай итеп, һайлауҙар өс көн дауамында – 6, 7 һәм 8 сентябрҙә үтә.
Башҡортостан халҡы төбәк башлығы өсөн тауыш бирәсәк. Шулай уҡ ошо көндәрҙә бер мандатлы Өфө округында Дәүләт Йыйылышы – Ҡоролтай депутатын өҫтәмә һайлау һәм республиканың төрлө райондарында урындағы үҙидараның вәкиллекле органдары депутаттарын һайлау үтәсәк.
Башҡортостанда бөтәһе 218 һайлау кампанияһы уҙа.
Республикала 69 территориаль һәм 3 302 участка һайлау комиссияһы эшләй. Өҫтәмә бер комиссия — Мәскәүҙә.
Наилә Имаева.
