Журналистарҙың да үҙ фестивале бар

Журналистарҙы Башҡортостан Республикаһының Матбуғат агентлығы етәксеһе вазифаһын башҡарыусы Елена Арямнова сәләмләне.

– Форум матбуғат өлкәһендә, интернет-баҫмала, телевидение һәм радиола эшләгән барлыҡ журналистарҙы берләштерә. Беҙҙең команда республика медиайылъяҙмаһын алып бара. Үҙ эшегеҙҙең оҫтаһы булыуығыҙ һәм төплө аҡылығыҙ менән артабан да Башҡортостандың үҫешенә өлөш индерерһегеҙ, тип ышанам, – тине Елена Арямнова.

Тәү сиратта журналистиканы үҫтереүгә ҙур өлөш индергән коллегаларыбыҙҙы бүләкләү тантанаһы үтте. Араларында “Башҡортостан” гәзите хмәткәрҙәре лә бар. Ауыл хужалығы бүлеге мөдире Лилиә Нуретдинова менән мәғариф бүлеге мөдире Гөлдәр Яҡшығоловаға Башҡортостан Республикаһы Премьер-министрының Рәхмәт хаттары тапшырылды.

– Журналист тәүлек әйләнәһенә эшләй, тиҙәр. Был ысынлап та шулай. Матриалды ваҡытында тапшырырға, ҡыҙыҡлы геройҙар табырға, теге йәки был мәсьәләне асыҡларға кәрәк, тип сабабыҙ. Ә Журфест беҙгә бер аҙға туҡтап ял итеү мөмкинлеген бирә, уның тәбиғәт ҡосағында уҙыуы бигерәк тә яҡшы, – тип тәьҫораттары менән уртаҡлашты хеҙмәттәштәребеҙ.

Шулай уҡ бөгөн 12 журналист “Башҡортостан Респбликаһының атҡаҙанған матбуат һәм киң мәғлүмәт хеҙмәткәре” тигән маҡтаулы исемгә лайыҡ булды. Уларҙың береһе – билдәле алып барыусы, “Башҡортостан” телерадиокомпанияһының ижтимағи-сәйәси тапшырыуҙар мөхәррире Гөлсимә Иштанова хеҙмәттәштәренә рәхмәт еткерҙе.

– Һәр тапшырыу – ул күмәк хҙәт емеше. Бер кеше кадр алдына сығып баҫһын өсөн кадр артында егермеләгән кеше көс һала. Шуға был награданы тотош командабыҙҙыҡы тип әйтер инем, – тине ул.

Фестивалдең программаһы бай. Оҫталыҡ кластары, спорт уйындары, ижади конкурстар... Айырыуса тәжрибә майҙансығында ҡатнашыуҙы журналистар һәр саҡ көтөп ала. Мәҫәлән, бер нисә минуттан РФ Журналистар союзы секретары, филология фәндәре кандидаты, М.В. Ломоносов исемендәге Мәскәү дәүләт университеты доценты Роман Александрович Серебряныйҙың оҫталыҡ дәресе башланасаҡ.

Автор фотолары.

Автор:Лилия Нуретдинова